काठमाडौं । प्रतिनिधिसभाका सभामुख देवराज घिमिरेले तिलगंगा नेत्र विश्वविद्यालयसम्बन्धी विधेयक चालु अधिवेशनबाटै पारित गर्न आफूले सक्दो पहल गरिरहेको बताएका छन् । डा. सन्दुक रुइतले आँखाका क्षेत्रमा कमाएको अन्तर्राष्ट्रिय ख्यातिलाई समेत ध्यानमा राखेर आफूले उक्त विश्वविद्यालयसम्बन्धी विधेयक संसद्‌मा दर्ता गर्ने काममा पनि सहयोग गरेको उनले उल्लेख गरे ।

शनिबार काठमाडौंमा ताप्लेजुङ सरोकार केन्द्रले आयोजना गरेको एक कार्यक्रममा उनले उक्त विश्वविद्यालय बनेपछि नेपालले आँखाका क्षेत्रमा अध्ययन, अनुसन्धानलगायत कामलाई सहज ढंगले अघि बढाउन सकिने विश्वास व्यक्त गरे । सरकारले पनि विधेयकलाई अघि बढाउन महत्त्व दिएको उनले बताए ।

सभामुख घिमिरेले उक्त विधेयकमा देखिएको असजिला हटाउन पनि आफूले हरसम्भव प्रयास गरिरहेको बताए । न्युज एजेन्सी नेपाल