झापा । झापामा ८२७ हेक्टर भू–भागमा सिँचाइ सुविधा विस्तार भएको छ । आर्थिक वर्ष २०८०/०८१ मा १३० हेक्टरमा सुविधा विस्तार तथा ६९७ हेक्टरमा सिँचाइ सेवा पुनःस्थापना गरिएको हो ।

जलस्रोत तथा सिँचाइ विकास डिभिजन कार्यालयका प्रमुख शैलेश पोखरेलका अनुसार साना–ठूला गरी १३२ आयोजना सम्पन्न भएसँगै सिँचाइ सुविधा विस्तार भएको हो । 

“गत आवमा कार्यालयको पुँजीगतर्फ विनियोजित रकम ३१ करोड ८९ लाख ४८ हजारमध्ये २९ करोड आठ लाख ३८ हजार ४७४ खर्च भएको छ । 

चालुतर्फ पनि विनियोजित बजेटको ९२.७ प्रतिशत खर्च भयो । गत वर्ष कोसी प्रदेश सरकार सञ्चालनमा विवाद हुँदा बजेट ढिलागरी प्राप्त भएकाले आयोजना सञ्चालनमा ढिलाइ भएको प्रमुख पोखरेलले बताए । 

यसैगरी उक्त कार्यालयले नदी व्यवस्थापनतर्फ  सात हजार १०९ मिटर सम्पन्न गरी एक हजार ६८४ हेक्टर जमिन संरक्षण र ६० हेक्टर जमिन उकास गरेको छ । 

यी योजना सम्पन्न भएसँगै दुई हजार ६०४ परिवार लाभान्वित भएका डिभिजन प्रमुख पोखरेलले बताए ।  

बहुवर्षीय योजनाहरू मेचीनगर–८ मा सञ्चालित निन्दाखोला सिँचाइ योजना, मेचीनगर–७ मा पालिया पूर्व सिँचाइ योजना र गौरीगञ्जमा सञ्चलित तल्लो किस्ने सिँचाइ योजना अन्तिम चरणमा रहेका उक्त कार्यालयले जनाएको छ । यी योजना सम्पन्न भएसँगै दुई हजार १०५ हेक्टर क्षेत्रफलमा सिँचाइ सुविधा पुग्नेछ । रासस