काठमाडौं । ग्लोबल आइएमई बैंक लिमिटेडको डेबिट तथा क्रेडिट कार्डवाहक र मोबाइल बैंकिङ प्रयोगकर्ताहरूलाई वन्डरल्यान्ड नेपालमा १० प्रतिशत रकम बोनस स्वरुप प्रदान गरिने भएको छ । 

किक फन वल्र्डबाट बुङ्गमतीमा सञ्चालित वन्डरल्यान्ड नेपालको सेवा मूल्यको १० प्रतिशत रकम बोनस स्वरुपप्रदान गर्ने समझदारी भएको हो ।

उक्त समझदारीमा बैंकका वाग्मती प्रदेश कार्यालय म्यानेजर निकिता भण्डारी थापा र किक फन वल्र्डका मार्केटिङ प्रमुख शिखर बस्नेतले हस्ताक्षर गरेका हुन् ।

समझदारी अनुसार बैंकका ग्राहकहरूले वन्डरल्यान्ड नेपाल, बुङ्गमतीमा उपलब्ध मनोरञ्जनात्मक तथा अन्य सेवाको लागि त्यहाँबाट जारी हुने भुक्तानीको लागि बैंकको डेबिट तथा क्रेडिट कार्ड र मोबाइल बैंकिङ प्रयोग गर्नुपर्ने हुन्छ । प्रयोग गर्दा उक्त कार्डमा १० प्रतिशत बोनस थप हुने जनाइएको छ । 

बैंकले ३५४ शाखा कार्यालय, ३८४ एटीएम, २७७ शाखारहित बैंकिङ सेवा, ६८ एक्सटेन्सन तथा राजस्व संकलन काउन्टर तथा तीन वटा वैदेशिक प्रतिनिधि कार्यालयमार्फत सेवा दिँदै आएको छ ।