काठमाडौं । नेकपा (एकीकृत समाजवादी)का सम्मानित नेता एवं पूर्वप्रधानमन्त्री झलनाथ खनालले संविधान संशोधन गर्ने नेपाली कांग्रेस र नेकपा (एमाले)बीचको सहमति मान्य नहुने चेतावनी दिएका छन् । शनिबार काठमाडौंमा पुष्पलाल स्मृति प्रतिष्ठानले आयोजना गरेको एक कार्यक्रममा उनले यस्तो बताएका हुन् ।

दुई ठूला पार्टीले सत्तास्वार्थका निम्ति गरिएको कुनै पनि सहमति सैह्य नहुने उनले चेतावनी दिए । समानुपातिक प्रणालीलाई मास्ने गरी दुई ठूला दलबीच सहमति भएको सुनिएको उनले उल्लेख गरे । त्यो सही भए आफूहरूले मेचीदेखि महाकालीबाट ‘संग्राम’ सुरु गर्ने उनले बताए ।

खनालले संविधान संशोधनको विषयलाई ठूला राजनीतिक दलले खेलाँचीको विषय बनाउन नहुनेमा जोड दिए । कांग्रेस–एमालेले हस्ताक्षरसहितको सातबुँदे सहमति प्रस्तुत नगरेर संसद्लाई समेत ढाँटेको उनले जिकिर गरे ।

कार्यक्रममा झलनाथ खनालको भनाइ पढ्नोस्–
अहिलेसम्म यी दुईवटा पार्टीले गरेको तथाकथित सहमति खै कहाँ आयो त यो ? संसद्‌मा पनि ढाँटिएको छ, हेर्नुस् । संसद्‌भित्र त्यसको हस्ताक्षर गरिएको पत्र किन प्रस्तुत गर्न सकिएन ? ती पार्टीहरूले किन गर्न सकेनन् ? किन लुकाइरहेका छन् ती कुरा ? कसैले नौबुँदे भन्दै छन् । नौबुँदे हो कि १५ बुँदे हो कि के थाहा हामीलाई  ! खै सही गरेको सहमतिपत्र ? हामी त्यो चाहन्छौँ । नेपाली जनता त्यो हेर्न चाहन्छन् । अनि, यो संशोधन गर्ने हो भने केमा संशोधन गर्ने ? यो संविधान संविधानसभाले बनाएको हो, कसैको निगाहले बनाइएको होइन । दुईवटा पार्टीले मात्रै बनाएको पनि होइन । संविधानसभाले बनाएको हो । र, संविधानसभाको म्यान्डेटलाई अभिव्यक्ति नगर्ने कुनै पनि संशोधन नेपाली जनतालाई मान्य हुँदैन । संविधान संशोधन यस्तो खेलाँची गट्टी खेल होइन । दुईवटा पार्टीले आफ्नो सत्तास्वार्थका लागि यस्तो गट्टी खेल गर्नुहुन्छ ? होइन त्यस्तो कुरा । त्यसकारणले हामी त्यो कुरालाई मान्दैनौँ । त्यसमाथि भनिन्छ के भन्दाखेरि यो समानुपातिकचाहिँ समाप्त गर्ने रे ! साँँच्चै हो यो ? आउनुपर्‍यो । साँच्चै हो भने यो दुईवटा पार्टीको अधिनायकत्वको विरुद्ध अब मेचीदेखि महाकालीबाट संग्राम सुरु हुन्छ, हेर्नुस् । यो सानासाना विभिन्न समूह, जाति, समूह, क्षेत्र आदिलाई प्रतिनिधित्व गराउनका लागि हामीेले ल्याएको यो समानुपातिक प्रणाली हो । समानुपातिक प्रणालीले कमजोर, साना, पिछडिएका समूहरूको हितलाई प्रतिनिधित्व गरिरहेको छ । त्यसकारण यो लोकतन्त्रको पनि बडो मार्मिक कुरा हो । यो त पुँजीपतिहरूले एउटा अपोजिसन, एउटा सत्ता चाहन्छ । यही चरित्रको आधारमा पुँजीवादलाई बचाउन खोजिएको छ । अब समाजवादले त्यो कुरालाई सहन गर्दैन । समाजवादले अब त्यस्तो कुरालाई मान्दैन । न्युज एजेन्सी नेपाल