काठमाडौं । ब्रिटिस कलेजको एसीसीए शैक्षिक कार्यक्रममा अध्ययरत विद्यार्थी स्यान्ड्रा खत्री विश्व टपरको दर्जामा पर्न सफल भएकी छिन् ।

ब्रिटिस एजुकेशन ग्रुपअन्तर्गतको ब्रिटिस कलेजमा अध्ययनरत विद्यार्थी खत्रीले ‘ट्याक्सेसन’ विषयको परीक्षामा विश्वस्तरिय नतिजा ल्याएकी हुन् ।

गत जुन महिनामा सम्पन्न ट्याक्सेसन विषयको परीक्षामा ९४ प्रतिशत अंकसहित खत्री विश्वकै शीर्ष तीनमा पर्न सफल भएको कलेजले जनाएको छ ।

ब्रिटिस कलेजमा अध्ययनरत विद्यार्थीहरूले निरन्तर रूपमा विश्वस्तरिय नतिजाहरू ल्याइरहेको कलेजको भनाइ छ ।
यसअघि सन् २०२३ को जुन महिनामा भएको ट्याक्सेसन विषयको परिक्षामा दिपांशु थापाले ९८ प्रतिशत अंक ल्याएर विश्वकै दोस्रो स्थान र ९७ प्रतिशत अंक ल्याएर हर्षवर्धन शाहले तेस्रो स्थान हासिल गरेको कलेजले जनाएको छ ।

यस्तै, रञ्जन पौडेलले ‘स्ट्राटेजिक विजनेश रिपोर्टिङ’ विषयमा ९१ प्रतिशत अंक ल्याएर दोस्रो स्थान हासिल गरेका थिए । रिया मानन्धर र रेजिका महर्जन दुई पटकसम्म विश्वकै उत्कृष्ट विद्यार्थी बनेको कलेजले जनाएको छ ।

विश्वस्तरिय नतिजा प्राप्त गरेपछि उनले खुसी व्यक्त गरेकी छन् । “नेपालको सन्दर्भमा ब्रिटिस कलेजले प्रदान गरिरहेको एसीसीए शैक्षिक कार्यक्रम उत्कृष्ट छ । राम्रो नतिजाको कारण ब्रिटिस कलेजले अन्तर्राष्ट्रिय अवार्डहरू समेत पाएको छ । म यस कलेजमा सन् २०२३ को जुलाईमा भर्ना भएको हुँ । यस कलेजले विश्वस्तरिय सुविधाहरू प्रदान गर्नुको साथै यहाँका शिक्षकहरू पनि प्रतिष्ठित हुनुहुन्छ । त्यसैले इच्छुक विद्यार्थीहरूलाई पनि ब्रिटिस कलेज छनोट गर्नको लागि आग्रह गर्दछु,” खत्रीको भनाइ उद्धृत गर्दै कलेजले भनेको छ ।

एसीसीए शैक्षिक कार्यक्रमको सिनियर प्रोग्राम म्यानेजर दीपेन्द्रकुमार श्रेष्ठले ब्रिटिस कलेजले प्रदान गरिरहेको एसीसीए कार्यक्रमको नेपालमा राम्रो चर्चा रहेको दाबी गरे ।

एसीसीए विश्वको सबैभन्दा ठूलो र द्रुत गतिमा विस्तार भइरहेको अन्तर्राष्ट्रिय लेखा निकाय हो । विश्वका १७९ देशमा फैलिएको एसीसीएमा पाँच लाख ३५ हजारभन्दा बढी विद्यार्थीहरू अध्ययनरत छन् ।