काठमाडौं । अर्जेन्टिना र मोरोक्कोबीचको खेलमा समर्थक मैदानमा पसेर हुलदंगा गरेको घटनापछि पेरिस ओलम्पिक आयोजकले खेलका लागि सुरक्षा बढाउने भएको छ ।

आयोजकले अर्जेन्टिना र मोरोक्कोबीचको खेल दौरान मैदान पसेका समर्थकलाई सुरक्षा कर्मचारीले मैदानभरि नै पछ्याएको जनाउँदै त्यसले कुनै मुख्य सुरक्षा जोखिम नबनाएको र त्यसबाट पाठ सिकेको उल्लेख गरेको छ । 

ओलम्पिकका सुरक्षा निर्देशक ब्रुनो ले रेले सञ्चारकर्मीहरूलाई सेन्ट एटिनेमा प्रतियोगिताको आगामी खेलमा थप सुरक्षा अधिकारी र समर्थक छेक्ने बारलाई बढाउने बताए । 

सेन्ट एटिनेमा अन्य रंगशालाका तुलनामा मैदान प्रवेश गर्न सहज रहेको अन्तर्राष्ट्रिय सञ्चारमाध्यमहरूले जनाएका छन् । ले रेका अनुसार प्रतियोगिताका दौरान १७ हजार सुरक्षा एजेन्टले ४० प्रतियोगिताको क्षेत्र र केही सुरक्षा एजेन्टले अन्य १०० प्रतियोगिता नहुने क्षेत्रमा सुरक्षा दिनेछन् । 

प्रतियोगिताको सुरक्षा नहुने क्षेत्रहरूमा ओलम्पिक भिलेज, प्रशिक्षण केन्द्र र होटेलहरू पर्छन् । यस्तै, बाक्लो खेल तालिका रहेको दिनमा सुरक्षा एजेन्टहरू २२ हजारको संख्यामा परिचालित हुनेछन् । 

ले रेले ओलम्पिक भेन्युभन्दा बाहिरको सुरक्षा प्रहरीले र भेन्युभित्रको सुरक्षा आयोजकले हेर्ने बताए ।