![सौर्य एयर विमान दुर्घटना : मृतकका आफन्तले आज पनि शव बुझ्न पाउँदैनन् ?](https://12khari.top/uploads/posts/mritak-kaa-aafanta-1721954814.jpg)
काठमाडौं । सौर्य एयरको विमान दुर्घटनामा परेर मृत्यु भएका १८ जनाको शव बुझ्ने पर्खाइमा उनीहरूका आफन्त छन् ।
सबै शव त्रिवि शिक्षण अस्पतालमा राखिएको छ । आफन्तहरू शव बुझ्ने पर्खिइरहेका छन् । त्रिवि शिक्षण अस्पताल महाराजगन्जले सबैको डीएनए परीक्षणमार्फत पहिचान गरेर शव आफन्तलाई दिने तयारी गरेको छ ।
त्रिवि शिक्षण अस्पतालका फरेन्सिक विभाग प्रमुख डा. गोपाल चौधरीका अनुसार सबै शव जलेर चिन्न नसकिने अवस्थामा छन् । उनीहरुको फिंगर प्रिन्ट, डेन्टल म्याचिङ आदिको माध्यमबाट पहिचान गर्नुपर्ने हुन्छ ।
सबै मृतकको तथ्यांक संकलन गरी शव पहिचान गर्न करिब तीन दिन लाग्ने उनले बताएका थिए । तर थप समय लाग्ने बताइएको छ ।
डीएनए परीक्षण गर्नुपर्ने अवस्था आए दुई हप्तासम्म लाग्नसक्ने त्रिवि शिक्षण अस्पतालका निर्देशक प्रा.डा. दिनेश काफ्लेले बताएका छन् ।
उनका अनुसार बिहीबार अपराह्नसम्म १२ शवको परीक्षण सकिएको छ । कतिपय शवहरू जलेर पहिचान गर्न कठिन भएकाले डीएनए परीक्षणसमेत गर्नुपर्ने सम्भावना छ ।
“शव पहिचान नभइकन दिन मिल्दैन । १२ वटा शवको परीक्षण सकिएको छ, अहिले तीनवटा शव परीक्षण भइरहेको छ । पहिचान नभएकाहरूको डीएनए गर्नुपर्यो भने नतिजा आउन दुई हप्ता लाग्छ,” उनले भने, “परेन भने शुक्रबार बेलुकासम्म सबै शवको परीक्षण सकिन्छ होला । प्रक्रिया मिलेपछि शनिबार आफन्तलाई हस्तान्तरण गर्न सकिन्छ ।”
यसैबीच, ज्यान गुमाएका व्यक्तिका परिवारले माग पूरा नभएसम्म शव नबुझ्ने बताएका छन् । त्रिवि शिक्षण अस्पतालमा आफन्तको शवको पर्खाइमा बसेका उनीहरूले एयरलाइन्सका प्रतिनिधिसँगको भेटमा विभिन्न माग राख्दै माग सम्बोधन नभएसम्म शव नबुझ्ने बताएका हुन् ।
मृतकका परिवारलाई रोजगारी, सन्तानको उच्च शिक्षालगायत व्यवस्था एयरलाइन्सले गर्नुपर्ने उनीहरूको माग छ ।
बिहीबार दिउँसो शिक्षण अस्पताल पुगेका सौर्य एयरलाइन्सका व्यवस्थापक मुकेश खनालसँग परिवारले यस्ता माग अघि सारेका हुन् । खनालले परिवारलाई क्षतिपूर्ति बिमामार्फत गर्न एयरलाइन्सले प्रक्रिया अघि बढाएको जवाफ दिएका थिए ।
परिवारले कम्पनीका सीईओले भेटेर आफूहरूसँग लिखित सम्झौता गर्नुपर्ने माग राखेका छन् ।
बुधबार बिहान काठमाडौंस्थित त्रिभुवन अन्तर्राष्ट्रिय विमानस्थलमा भएको दुर्घटनामा परी सौर्य एयरका प्राविधिकसहित १८ जनाको मृत्यु भएको थियो । क्याप्टेन मनिषरत्न शाक्यको भने घाइते अवस्थामा उद्धार गरिएको थियो । उनको उपचार भइरहेको छ ।