काठमाडौं । गृहमन्त्री रमेश लेखकले सहिद मुकेश कायस्थको परिवारले राज्यबाट पाउनुपर्ने सुविधा दिलाउने प्रतिबद्धता व्यक्त गरेका छन् ।

बुधबार गृहमन्त्रालयमा भेट्न पुगेकी मुकेशकी आमा मिरा कायस्थसँग गृहमन्त्री लेखकले लोकतन्त्रिक गणतन्त्र स्थापनामा कायस्थको योगदान रहेको बताए । "राज्यबाट पाउने सुविधा दिलाउने मेरो प्रतिबद्धता भयो । म यसमा लाग्छु," लेखकले भने ।

दोस्रो जनआन्दोलन (२०६२–६३)का घाइते कायस्थको गत वर्ष वैशाख २७ गते निधन भएको थियो । तत्कालीन सरकारले जेठ २ गते उनलाई सहिद घोषणा पनि गरेको थियो । तर, राज्यबाट सहिद परिवारले पाउने सुविधा आफूले नपाएको मुकेशकी आमा मिराको भनाइ छ ।

गृहमन्त्री लेखकसँगको भेटमा उनले भनिन्, "बाबु सहिद भएपछि राज्यबाट पाउनुपर्ने सुविधा पाएको छैन । राज्यबाट पाउनुपर्ने सबै सुविधा पाउनुप‍र्‍यो ।"