काठमाडौ । नेपालमा पूर्ण रूपमा नेपाली हस्पिटालिटीसहित पहिलो सेवा प्रारम्भ गरेको होटेल पौवा प्रालिले खोटाङको हलेसीमा पौवा रिसोर्ट र सिन्धुलीको सुनकोसी किनारमा अवस्थित मुलकोटमा पौवा होटेल सुरु गरेको छ । देशभर पौवालाई विस्तार गरिएको पौवा ग्रुपले १४औँ शाखा सिन्धुलीको मुलकोटस्थित सुनकोसी किनारमा ४५ रोपनी क्षेत्रफलमा ५० करोडको लगानीमा पौवाबीच रिसोर्ट सञ्चालन गरेको हो ।
यस्तै, खोटाङको हलेसीमा ४५ रोपनी क्षेत्रफलमा ४० करोड भन्दा बढीको लगानीमा पौवा रिसोर्ट सञ्चालनमा ल्याएको हो । नेपालको पर्यटन उद्योगलाई थप उचाइमा पु¥याउनका लागि मिसन १०० को योजनासहित अगाडि बढेको होटेल पौवा नेपालको पश्चिम क्षेत्रबाट पूर्वतर्फ अगाडि बढेको हो ।
होटेल पौवाका अध्यक्ष दुर्गाप्रसाद भण्डारीका अनुसार आठ वर्षदेखि पर्यटक उद्योगलाई विस्तार गर्नका लागि होटेलमा लगानी गरिएको हो । काठमाडौंदेखि ९० किलोमिटरको दूरीमा रहेको सिन्धुलीको मुलकोट पर्यटकका लागि उत्तम गन्तव्य भएको उनको भनाइ छ ।
“खोटाङको हलेसी महादेव किराँत, बौद्ध र सनातन हिन्दुहरूको संगमस्थल भएकोले हुनाले आन्तरिक र बाह्य धर्मालम्बीहरूलाई लक्षित गरेको हलेसी तुवाचुङ नगरपालिकामा ४५ रोपनी क्षेत्रफलमा रिसोर्ट सञ्चालन गरेका छौँ । रिसोर्टबाट ३६० डिग्रीमा हसेलीको भ्यु हेर्न पाइन्छ,” उनले भने ।
विश्व शान्तिका दुत गौतमबुद्धको जन्मस्थल लुम्बिनीबाट होटेल पौवाको पहिलो यात्रा सुरु भएको थियो । पौवाले रुपन्देहीकै भैरहवा र बुटवल, कपिलवस्तुको गोरुसिंगे दाङको भालुवाङ, लमही र घोराही, कर्णाली प्रदेशको जुम्ला, पाल्पाको तानसेन, गुल्मीको रेसुंगा, सुदूरपश्चिमको धनगढी, पर्यटकीय राजधानी पोखरा, काठमाडौको गौशाला हुँदै पुर्वी नेपालमा प्रवेश गरेको हो ।
पौवाले अहिलेसम्म तीन वटा मोडेलमा आफ्नो सेवा विस्तार गर्दै आएको बताइएको छ । एक दशकमा १०० शाखा विस्तारको लक्ष्यसहित ‘मिसन १००’ योजना बनाएको होटेल पौवा देशभर नेपाली आतिथ्यतासहितको चेन होटेलको रूपमा फैलिँदै गएको बताइएको छ ।