काठमाडौं । नेकपा एमालेका सांसद वासुदेव घिमिरेले उपसभामुख इन्दिरा राना मगरको पत्रका विषयमा छलफल गर्न माग गरेका छन् । बुधबार सिंहदरबारमा जारी राज्यव्यवस्था तथा शुसासन समितिको बैठकमा संवेदनशील विषय भन्दै छलफलको माग गरेका हुन् । 

“उपसभामुखसँग जोडिएको नेपाली व्यक्ति अमेरिका पठाउन पठाउन खोजेको र लेनदेन पनि भएको कुरा बाहिर आएको छ । समितिमा उजुरी आएको कुरा छ,” उनले भने, “यो विषय समितिमा जानकारी आओस् र आवश्यक छलफल होस् । यो संवेदनशील विषय हो ।”

नेपाली कांग्रेसकी सांसद ईश्वरी न्यौपानेले उपसभामुख मगरले संसद्को लेटरप्याड दुरुपयोग गरेको आरोप लगाएकी छन् । उनले उपसभामुखमा इमान्दारिता नदेखिएको बताइन् ।  

“एकजना मान्छे चिनेको छु, साइकल चलाउने साथी भन्नुभयो । लेटर हेड दुरूपयोग गर्न हुँदैन थियो । तर भयो,” उनले भनिन्, “उहाँले एकजना सहयोगी र चारजना चिन्दिन भन्नुभयो । सहयोगी पनि रहेनछ । संस्थामा काम गर्ने व्यक्ति भन्नुभयो, त्यो पनि हैन रहेछ ।”

उपसभामुखको पार्टीमा नै उजुरी परेको भन्दै उनले भनिन्, “उहाँकै पूर्वमहामन्त्रीले फेसबुकमा लेख्जुभएको छ । नौ लाखको लेनदेन कारोबारको उजुरी परेर सामसुम भयो भन्नेछ ।” 

यसबारे छानबिन हुनुपर्ने न्यौपानेको माग छ । विश्वमा नेपालको उपसभामुख मानव बेचखिनमा संलग्न छन् आरोप नआओस् भन्दै उनले भनिन्, “उहाँको छानबिन हुनुपर्छ । दोषी हो वा होइन निर्दोष छुट्याउनु पर्छ ।” 

‘कमिसन अन द स्टाटस अफ वुमन’को ६७ औं सत्रमा भाग लिन जान उपसभामुख रानाले पाँचजनाका लागि अन्तर्वार्ताको मिति अघि सार्न अमेरिकी दूतावासलाई लेखेको पत्र सार्वजनिक भएको थियो । 

२६ फेब्रुअरी २०२३ मा उपसभामुख रानाले उपेन्द्र गौतम, सुस्मा लामा, राजेश लामा तामाङ, सुजन घर्तिमगर र धनप्रसाद गुरुङको अन्तर्वार्ता अघि सार्न आग्रह गर्दै पत्र लेखिकी थिइन् ।