काठमाडौं । उपसभामुख इन्दिरा रानामगरविरुद्ध प्रतिनिधिसभाअन्तर्गतको राज्यव्यवस्था तथा सुशासन समितिमा उजुरी परेको छ । 

भक्तपुरको बालकोटका अर्जुन बास्कोटाले उपसभामुखलाई हटाउन माग गर्दै उजुरी दिएका हुन् । “उपरोक्त सम्बन्धमा माननीय उप–सभामुख इन्दिरा रानाले ई.सं.२६/०२/२०२३ मा संसद् सचिवालय र आफ्नो पदको दूरुपयोग गरी अमेरिकी  राजदूतावासमा पदीय मर्यादाविपरीत गैरसांसद व्यक्तिलाई भिसा सिफारिस गरेको हुँदा सो पत्र समेत संलग्न गरी उप–सभामुखलाई पद दुरुपयोग गरेको अभियोगमा हटाउन निवेदन चढाएको छु,” निवदेनमा भनिएको छ ।

‘कमिसन अन द स्टाटस अफ वुमन’ को ६७औँ सत्रमा भाग लिन जानका लागि उपसभामुख रानाले पाँचजनाको लागि अन्तर्वार्ताको मिति अघि सार्न अमेरिकी दूतावासलाई लेखेको पत्रले तरंग सिर्जना गरेको छ । २६ फेब्रुअरी २०२३ मा उपसभामुख रानाले उपेन्द्र गौतम, सुस्मा लामा, राजेश लामा तामाङ, सुजन घर्र्तीमगर र धनप्रसाद गुरुङको अन्तर्वार्ता अघि बढाउन आग्रह गर्दै पत्र लेखिकी थिइन् ।