काठमाडौं । प्रभु बैंकका कर्मचारी र ग्राहकलाई टिस्टुङमा अवस्थित टिस्टुङ्ग रिसोर्टका विभिन्न सेवामा छुट मिल्ने भएको छ । यसका लागि दुवै पक्षले एक सम्झौतापत्रमा हस्ताक्षर गरेका छन् ।

टिस्टुङ रिसोर्टका सञ्चालक गोविन्द महर्जन र सन्त महर्जन एवं प्रभु बैंकका तर्फबाट वाग्मती प्रदेश प्रमुख दिपेन्द्रबाबु विष्ट र मार्केटिङ म्यानेजर सविन शम्शेर राणाले सम्झौतामा हस्ताक्षर गरेका हुन् ।

सम्झौताअनुसार प्रभु बैंकका कर्मचारी तथा ग्राहकले बैंकसँगको आबद्धता प्रमाणका आधारमा आवास, खाना, खाजा तथा उक्त रिसोर्टमा उपलब्ध सबै सेवा सुविधामा विशेष छुट पाउने बैंकले जनाएको छ ।

मकवानपुरको उत्तरी भेगमा अवस्थित रिसोर्ट काठमाडौं उपत्यकाबाट दणिक्ष पश्चिमको भागसँग जोडिएको शान्त, सुन्दर र रमणीय ठाउँमा अवस्थित छ । विभिन्न जातजातिहरूको बसोबास रहेको यो स्थान समुद्री सतहबाट एकहजार ७०३ मिटर उचाइँमा रहेको छ ।

इन्द्र सरोवर (कुलेखानी), बज्रबाराही मन्दीर कुन्छाल बस्ती यहाँका प्रमुख आकर्षक गन्तव्यस्थल र कृषि पेसा यहाँको विशेषता भएको रिसोर्टले जनाएको छ ।