काठमाडौं । प्रधानमन्त्री केपी शर्मा ओली प्रधानमन्त्री बनेपछि पहिलोपटक प्रधानमन्त्रीसँग प्रश्नोत्तरको कार्यक्रम राखिएको थियो । 

सदनमा आकस्मिक र शून्य समयको कारबाही सकिएपछि सभामुख देवराज घिमिरेले प्रश्नोत्तर कार्यक्रम अघि बढाए । 

प्रधानमन्त्री रोष्ट्रममा उभिएपछि सभामुखले कांग्रेस सांसद धनराज गुरुङलाई प्रश्न सोध्न अनुमति दिए । 

गुरुङको प्रश्नपछि प्रधानमन्त्रीले पुष्पलाललाई सभ्झिए । 

त्यसपछि उनले गुरुङको प्रश्नमा प्रवेश गरेनन् । उनले संसदमा तथ्ययुक्त धारणा राख्न आग्रह गरे । 

“हामी यस गरिमामय संसद्मा छौं । यहाँ हामी बोल्दा भएका कुरा बोलौं । तथ्ययुक्त कुरा बोल्ने गरौं । पार्टी फरक होला त्यसो भनेर असभ्य तरिका ननिकालौं । झुटको सहारा नलिऔं,” ओलीले भने । 

उनले हिजो संसद्मा विद्युत महसुल टं«क लाइन सम्बन्धि उद्यमी व्यवसायी र उद्योगीबीचको विवाद वार्ताबाट टुंग्याउनुपर्छ भन्ने राखेको भन्दै स्मरण गराए । 

उनले सरकारले पाउने रकम असुल गर्नुपर्ने बताए । ओलीले प्रयोग नगरेको विद्युतको महशुल तिर्नुपर्दैन भनेर आफूले बोलेको सुनाए । 

ओलीले मिनाहा गर्नुपर्छ भनेको भनी गलत धारणा राखेको भन्दै आपत्ति जनाए । 

“म सिरियसली भन्दैछु । मलाई कुनै लप्पन छप्पन गर्नुछैन । मलाई कुनै सेटिङ र विभिन्न खालका तन्त्रहरु पछाडि कुद्नु पनि छैन । मैले देशको हितको पक्षमा लगभग सम्पूर्ण गरेको छु । बाँकी जीवन पनि समर्पण गर्छु क्लिनली,” ओलीले भने । 

ओलीले आफूले असुलउपर गर्नुपर्दैन मिनाहा गर्नुपर्छ भनेको भनि सांसदले बोलेको भन्दै आपत्ति जनाए । 

आजको संसद्मा नेकपा (माओवादी केन्द्र) का सांसद लेखनाथ दाहालले सो विषयमा बोलेका थिए ।  उनले भ्रष्टाचार छोप्नका लागि लाञ्छना नलगाउन आग्रह गरे । 

“कहिले सुन होइन पित्तल चढायो भनेको छ । अनेक प्रकारका फोटा छपाएको छ । अनेक गरेको छ । यो खालको तरिका माननीयको हैसियतमा शोभनीय हुँदैन,” ओलीले भने ।

ओलीले प्रधानमन्त्री बनेको कसैलाई चित्त नबुझेको हुन सक्ने बताए । झुटा लाञ्छना लगातार लगाउने कुरामा जवाफदेही हुन आग्रह गरे । 

उनले सुन भनेर पित्तल चढायो भनेर सदनमा नबोल्न आग्रह गरे ।  त्यसैक्रममा माओवादी केन्द्रका सांसद वर्षमानले प्रश्न उठाए । 

“सम्माननीय सभामुख महोदय । सम्माननीय प्रधानमन्त्रीज्यू कुन चाहिँ सन्दर्भमा बोल्दै हुनुहुन्छ । सायद, सभामुखज्यूले कहिँ न कहिँ रुलिङ गर्नुपर्छ होला । प्रश्नोत्तरमा हुनुहुन्छ सम्माननीय प्रधानमन्त्रीज्यू,” पुनले भने । 
त्यसपछि सभामुखले आसन ग्रहण गर्न आग्रह गरे । 

प्रधानमन्त्रीले प्रश्नोत्तर गरिरहेको बताए । त्यसपछि वर्षमानले कार्यकर्ताहरुलाई गाली गर्न आएको हो कि ? प्रश्नोत्तर गर्न भनि प्रश्न सोधे । 

जवाफमा ओलीले भने कसलाई गाली गरेको छ र ? गाली नगरौं भन्दैछु म उल्टै ।  त्यसपछि सभामुखले भने– माननीय सदस्य बसौं । ध्यानाकर्षण भएको छ । मैले त्यतै लान कोसिस गरिरहेको छु ।”

त्यसपछि सभामुखले प्रधानमन्त्रीलाई विषयमा केन्द्रित भएर जवाफ दिन निर्देशन दिए । 

ओलीले आफू विषय केन्द्रित भएको बताए । “सभामुख महोदय, म विलकुल विषय केन्द्रित छु,” ओलीले भने,“संसद्मा उठेका प्रश्नको लिखितको जवाफ दिनुपर्ने । त्यो भन्दा अगाडि अलिखित बीचमा बाटैमा आइपुग्यो ।” 
ओलीले कसैलाई गाली नगरेको भन्दै सचेत जनाए । त्यसपछि लिखित प्रश्नको जवाफ दिन थाले ।