काठमाडौं । चालु आर्थिक वर्ष २०८१/८२ मा कायममुकायम मुख्यसचिवसहित १५ जना सचिव (विशिष्ट श्रेणी) र ८३ जना सहसचिव तह (रा.प.प्रथम श्रेणी)का सरकारी निजामती कर्मचारीले अनिवार्य अवकाश जाने भएका छन् । 

२०८१ साउन १ गतेदेखि २०८२ असार मसान्तसम्मको अवधिमा सबै तहका कुल २ हजार ११९ जना सरकारी निजामती कर्मचारीले अनिवार्य अवकाश पाउने राष्ट्रिय किताबखाना (निजामती) ले जनाएको छ ।
 
किताबखानाका अनुसार, उमेर हद र सेवा अवधिका कारण अनिवार्य अवकाशमा जान लागेका हुन् । यसमा निजामती सेवाबाहेक अन्य सरकारी सेवाबाट अवकाश पाउने कर्मचारीको संख्या जोडिएको छैन । 

गत आर्थिक वर्ष २०८०/८१ मा १९ जना सचिव र ६४ जना सहसचिवसहित २ हजार २६० जना निजामती कर्मचारीले अवकाश पाएका थिए । किताबखानाका अनुसार आर्थिक वर्ष २०७९/८० मा २ हजार ४ सयभन्दा बढी निजामती कर्मचारीले अनिवार्य अवकाश पाएका थिए ।

चालु आर्थिक वर्ष २०८१/८२ मा ७१ जना विशिष्ट श्रेणीका सचिवमध्ये १५ जनाले अनिवार्य अवकाश पाउने छन् । कायममुकायम मुख्यसचिव लीलादेवी गडतौलाले २०८१ भदौ १५ गतेबाट अवकाश पाउँदै छन् । राष्ट्रिय योजना आयोगका सचिव तोयनारायण ज्ञवाली २०८१ भदौ २२ गतेबाट अनिवार्य अवकाशमा जाने छन् ।
 
चालु आर्थिक वर्षमा अवकास पाउनेमा सञ्चार तथा सूचना प्रविधि सचिव रामकृष्ण सुवेदी पनि छन् । उनले २०८१ कात्तिक ५ गते अवकाश पाउने छन् । 

यस्तै, सहरी विकास मन्त्रालयका सचिव मणिराम गेलालले २०८१ मंसिर १३ गते अवकाश पाउने किताबखानाको विवरणले देखाउँछ । नेपाल कानुन आयोगका सचिव तोयनाथ अधिकारीले २०८१ मंसिर २८ गते अवकाश पाउनेछन् ।

किताबखानाको रेकर्ड अनुसार, महिला, बालबालिका तथा ज्येष्ठ नागरिक मन्त्रालयका सचिव दिनेश भट्टराई २०८१ माघ २० गते, स्वास्थ्य मन्त्रालयका सचिव डा. रोशन पोखरेलले पनि २०८१ फागुन १२ गते अवकाश पाउने छन् । 
भुटानी शरणार्थी प्रकरणमा अभियुक्त बनेपछि निलम्बित सचिव टेकनारायण पाण्डे पनि २०८१ फागुन १२ गते अनिवार्य अवकाश जानेछन् ।

अर्थसचिव मधुकुमार मरासिनीले २०८१ फागुन १६ गते, गृह मन्त्रालयका सचिव एकनारायण अर्यालले २०८१ फागुन १८ गते, राष्ट्रिय तथ्याङ्क कार्यालयका सचिव अर्जुनप्रसाद पोखरेलले २०८२ वैशाख २ गते र संस्कृति, पर्यटन तथा नागरिक उड्डयन मन्त्रालयका सचिव गणेशप्रसाद पाण्डेयले २०८२ वैशाख ३० गते अनिवार्य अवकाश पाउने किताबखानाले जनाएको छ ।

सत्य निरुपण तथा मेलमिलाप आयोगका सचिव उदयराज सापकोटाले २०८२ वैशाख ३० गते, संघीय संसद सचिवालयका सचिव सुदर्शन खड्काले २०८२ जेठ ३० गते र परराष्ट्र मन्त्रालयकी सचिव सेवा लम्सालले २०८२ असार ५ गते अनिवार्य अवकाश पाउने छन् ।
 
किताबखानाको रेकर्ड अनुसार, चालु आर्थिक वर्षमा १७७ जना उपसचिवले अनिवार्य अवकास पाउने छन् । अघिल्लो आर्थिक वर्ष २०८०/८१ मा राजपत्रांकित द्धितीय श्रेणी (उपसचिव) तहका १८१ जनाले अवकाश पाएका थिए ।

चालु आर्थिक वर्ष २०८१/८२ मा राजपत्रांकित तृतीय श्रेणी (इन्जिनियर/कम्प्युटर अधिकृत/कर अधिकृत) तहका २५३ जना कर्मचारीले अवकाश पाउने छन् ।  अवकाश पाउने मितिभन्दा ६ महिना अगावै किताबखानाले सम्बन्धित कर्मचारीलाई अवकाश पाउनेबारे जानकारी दिने गर्छ ।

यी हुन् अवकाश पाउन लागेका कर्मचारी