काठमाडौं । राष्ट्रिय स्वतन्त्र पार्टी (रास्वपा)ले संवैधानिक परिषद्‌मा अल्पमतमा पर्ने भएपछि सत्तापक्ष उपसभामुख इन्दिरा रानामगरको चरित्रहत्या गर्न लागिपरेको आरोप लगाएको छ । आइतबार प्रतिनिधिसभा बैठकमा रास्वपा सांसद सुमना श्रेष्ठले उपसभामुखका नाममा ‘मिडिया ट्रायल’ भएको भन्दै आक्रोश पोखिन् ।

“उपसभामुखको नामबाट मिडिया ट्रायल भइरहेकोमा घोर आपत्ति जनाउँछु । यही सदन र सडकबाट अमूक मान्छेलाई भिसा चाहियो भनेर पुतला जलाएको यहीँबाट हैन हाम्रो एमपीहरूले ?,” उनले भनिन्, “खोजौँ, क–कसको लेडरहेड प्रयोग भएको छ । पार्टी र हामी तयार छौँ । तर, मन लाग्यो, मिडिया ट्रायल नगरौँ ।”

उनले रास्वपा र उपसभाखुलाई ‘हेप्नचाहिँ नखोज्नु होला’ भन्दै थपिन्, “एक वर्षअघिदेखि पत्र बोकेर बस्नुभएको रहेछ, कुन बेला ठोकौँ भनेर ।”

उनले भएजति जायजेथा दान गर्ने मान्छेको चरित्रहत्या गर्न खोजिएको भन्दै असन्तुष्टि जनाइन् । “संवैधानिक परिषद्‌मा अल्पमतमा परेको भए माग्नुहोस्, दिऊँला । तर, कसैको चरित्रहत्या नगर्नुस् । भएभरको जायजेथा अनाथ आश्रममा दिनेको चरित्रहत्या नगरौँ,” उनले भनिन् । 

मानव तस्करी शब्द प्रयोग गरिएकामा आपत्ति जनाउँदै उनले सुरुआतमा भुटानी शरणार्थी प्रकरणको छानबिन गर्न चुनौती दिइन् ।