वासिंटन । माइक्रोसफ्टले विश्वका करिब ८.५ मिलियन (८५ लाख) कम्प्युटरले शुक्रबार भएको आईटी अवरोधमा काम नगरेको जनाएको छ । यसखालको अवरोध अहिलेसम्मकै खराब भएको जनाउँदै ८५ लाख विन्डो डिभाइसमा भएको असरमा काउडस्ट्राइकले काम गरेको जनाएको छ ।

सुरक्षा कम्पनी क्राउडस्ट्राइकले त्रुटि गरेर करप्टेड सफटवेयर ठूलो संख्याका ग्राहकलाई पठाउँदा यस्तो अवस्था आएको जनाइएको छ ।

माइक्रोसफ्टका उपाध्यक्ष डेभिड वेस्टनले यो संख्या विश्वभरी रहेका विन्डोज मेसिनको एक प्रतिशतभन्दा कम भएको उल्लेख गरेका छन् ।

यसैबीच साइबर सुरक्षा विज्ञहरूले आईटी अवरोधका कारण विश्वभरी नै ह्याकिङको समस्या हुनसक्ने भएकोले सतर्क हुन आग्रह गरेका छन् ।

बिग्रिएको आईटी संरचना आफूले बनाइदिने भन्दै अनाधिकृत ह्याकरले सूचना लिएर गलत काम गर्न सक्ने भएकोले सतर्क रहन सम्बन्ध विज्ञहरूले सतर्क गराएका हुन् ।

बेलायत र अष्ट्रेलियाका साइबर एजेन्सीहरूले यसप्रकारको चेतावनी दिएका हुन् । यसैगरी फेक इमेल, कल र वेबसाइटमार्फत उनीहरूले आफू आधिकारिक भएको दाबी गर्न सक्ने जनाउँदै सतर्क रहन आग्रह गरिएको छ ।

क्राउडस्ट्राइक प्रमुख जर्ज कुर्जले कम्प्युटर फिक्सको लागि डाउनलोड गर्नुअघि कम्पनीका आधिकारिक व्यक्तिसँग कुरा भइरहेको सुनिश्चितता गर्न आग्रह गरेका छन् ।

शुक्रबार भएको आईटी अवरोधले विश्वभरका विमान कम्पनी, बैंक, मिडिया, स्वास्थ्य संस्था लगायतका निकाय नराम्रोसँग प्रभावित भएका थिए । हालसम्म अधिकांशमा सुधार आइसकेको भए पनि पहिलाको अवस्थामा पूर्ण रूपमा फर्किनसकेको जनाइएको छ । बीबीसी