विराटनगर । कोसी प्रदेशका मुख्यमन्त्री हिक्मतकुमार कार्कीले उद्योग व्यापार व्यवसायको क्षेत्रमा देखिएको मन्दी र निराशालाई चिरेर सरकार अगाडि बढ्ने बताएका छन् ।

शुक्रबार प्रदेश राजधानी विराटनगरमा माहेश्वरी महिला मञ्चले आयोजना गरेको श्रावण मेलाको उद्घाटन गर्दै मुख्यमन्त्री कार्कीले सरकार अब नयाँ परिस्थितिअनुसार अगाडि बढेको दाबी गरे । “संघ र प्रदेशमा अब स्थायित्व दिने गरी अघि बढेका छन् । व्यवसायी र नागरिकमा उत्साह आएको छ । अब निराश हुनु पर्दैन,” मुख्यमन्त्री कार्कीको भनाइ छ ।

उनले आर्थिक क्षेत्रका लागि महत्त्वपूर्ण भए पनि आफ्नो क्षमताअनुसार काम गर्न नसकेको जिकिर गरे । विराटनगरले आर्थिक क्षेत्रलाई अघि बढाउनु पर्ने गरी काम गर्न मुख्यमन्त्री कार्कीले आग्रह गरे । भने, “हाम्रा समाजिक सोच र चिन्तनले महिलाहरूलाई पछाडि पारिएको छ । उचित अवसर दिएमा पुरुषभन्दा राम्रो काम गर्न सक्नुहुन्छ ।”

माहेश्वरी महिलाले पनि समाज परिवर्तन र व्यवसायिक क्षेत्रमा राम्रो काम गरेकोमा प्रशंसा गरे ।

मञ्चकी अध्यक्ष ललिता जाजुले महिलालाई आत्मनिर्भर बनाउन र समाज सेवामा लाग्नका लागि संस्था सक्रिय रहेको सुनाइन् । दुई दिनसम्म सञ्चालन हुने मेलामा महिलाका विभिन्न स्टलहरू राखिएका छन् । गरगहनादेखि कपडा एवं सजावटका सामग्री मेलामा छन् ।