![उपसभामुखको पत्र, रास्वपाभित्रै सामसुम ! भन्छिन्– गरिबले कहिल्यै सिफारिस नपाउने ?](https://12khari.top/uploads/posts/Indirarana-1721301036.jpg)
काठमाडौं । उपसभामुख इन्दिरा रानामगरले अमेरिकी दूतावासका लागि लेखेको पत्रले अहिले राजनीतिक वृत्तमा तरंग सिर्जना गरेको छ ।
पाँच जनालाई अमेरिका लैजाने प्रयोजनस्वरुप अन्तवार्ताको समय आफूसँगै मिलाइदिन उपसभामुख रानामगरले लेखेको पत्रले अहिले तरंग सिर्जना भएको छ । रास्वपाका एक नेताले दिएको जानकारीअनुसार यो विषयमा केही महिनाअघि पार्टीका शीर्ष तहमा छलफल भएको थियो ।
पार्टीभित्र छलफल हुँदा इलाममा उपचुनावको तयारी भइरहेकाले यो विषय भित्रभित्रै सामसुम पारिएको एक नेताको टिप्पणी छ । उपसभामुखले पैसा लिएर अमेरिका लैजान लागेको हो कि पत्रमात्रै लेखिदिएको भन्ने विषय अझै स्पष्ट भने हुन सकेको छैन ।
तर पनि पत्र नै लेखिदिन नमिल्नै संसद् सचिवालयकै अधिकारीहरु बताउँछन् ।
उपसभामुखको विदेश भ्रमणको सम्पूर्ण प्रक्रिया संसद् सचिवालयकै अन्तराष्ट्रिय शाखाले गर्ने हुँदा उपसभामुखले सिफारिसमेत गर्न नमिल्ने उच्च अधिकारीहरुको तर्क छ ।
यस विषयमा रास्वपाले भने अहिलेसम्म कुनै प्रतिक्रिया जनाएको छैन ।
सत्तारुढ कांग्रेस र एमालेका नेताहरुले भने गम्भीर प्रकृतिको काम भएको हुनाले उपसभामुखले राजीनामा दिनुपर्ने बताउँदै आएका छन् ।
“यो विषय हामीले संसद्कै बैठकमा पनि उठाउनेछौँ,” राज्य व्यवस्था तथा सुशासन समितिका सभापतिसमेत रहेका कांग्रेस सांसद रामहरि खतिवडाले भने, “उहाँले गम्भीर प्रकृतिको काम गर्नुभएको छ । सहजरुपमा नैतिकता देखाए उहाँको लागि राम्रो हुनेछ ।”
उपसभामुख रानाले भने आफूलाई प्रक्रिया थाहा नभएर त्यस्तो भएको बताउँछिन् ।
“मैले गलत नियतले यो काम गरेको होइन,” रानाले बाह्रखरीसँग बिहीबार अपराह्न कुरा गर्दै भनेकी थिइन्,“म उपसभामुख भएर भर्खर भएर पार्लियामेन्ट आएकी थिएँ, दुई महिना पनि भएकै थिएन । म सगरमाथामा नारी दिवस मनाउन ‘बालकृष्ण’हरुसँगै जान रेडी थिएँ । यत्तिकै मान्छेहरु त्यो आठ मार्चको महिलाहरुको प्रोग्राम ‘सीएसडब्लु ६७’ जान पत्र लिएर आए ।”
उनले आफूलाई पत्र दिन हुने कि नहुने भन्नेबारेमै थाहा नभएको बताइन् ।
“अमेरिकाले त एक वर्षपछिको डेट दिएको छ नि त साधारण मान्छेका लागि, त्यसमा उनीहरु प्रि डेट माग्न आएका थिए । मलाई यस्तो लेखिदिनुहुन्छ कि हुँदैन भन्ने नै थाहा थिएन । तर संसद् सचिवालयका अधिकारीसँग सोधेको हुन्छ भनिदिए,” उनले भनिन् ।
उनले सानो विषय मिडियाले उचालेको भन्दै आक्रोश व्यक्त गरिन् ।
“सानो कुरालाई यसरी बढाउने हो भने त यो देशमा केही गर्नै नहुने भयो । गरिबहरूले त कहिल्यै पनि सिफारिस नै नपाउने भए,” रानाले भनिन्, “कसले के गर्छ, कहाँ गर्छ मलाई त के थाहा हुन्छ र ? म आएको एक महिना पनि भएको थिएन त्यसबेला, मलाई के नियम थाहा हुन्छ भन्नुु त ? ब्युरोक्रेटहरुलाई थाहा होला ।”
राना अहिले भर्खरै पनि अमेरिका पुगेर फर्किएकी थिइन् । अहिलेसम्म आफूले कसैलाई पनि अमेरिका नपुर्याएको दाबी गर्दै पार्टीभित्रको छलफलका बारेमा पनि अनभिज्ञता प्रकट गरिन् ।
रास्वपाका एक सांसदले बाह्रखरीसँगको अनौपचारिक कुराकानीमा शुक्रबार बिहान उपसभामुखले केही महिनाअघि आफूलाई यसबारेमा सामान्यरुपमा जानकारी गराएको भए पनि गम्भीररुपमा नलिएको बताए ।
तर अहिले यति गम्भीर विषयमा पनि पार्टीको शीर्ष तहमा छलफल भएर कसरी सामसुम पारियो भन्ने विषयमा अब बहस हुनुपर्ने बताए ।
“मुकुल ढकालसहित बसेर सामसुम पारिएको भन्ने थाहा भयो,” ती सांसदले भने, “मुकुललाई थाहा हुने हामीलाई नहुने ? कस्तो अवस्था आयो पार्टीभित्र ? अब हामी गम्भीर छलफल गर्छौँ ।”
उनका अनुसार के गर्ने भन्ने विषयमा पार्टीभित्र कुनै छलफल भएको छैन ।