काठमाडौं । एमजी मोटर्सले आफ्नो एक सय वर्षको वार्षिकोत्सवको अवसरमा गुडवुड स्पिड फेस्टिवलमा नयाँ मोडलको गाडी एमजी साइबर जीटीएस सार्वजनिक गरेको छ । कम्पनीले यो विशेष कारले विद्युतीय सवारी (ईभी)का क्षेत्रमा आफ्नो इन्नोभेसनको लगावलाई झल्काएको बताएको छ ।

एमजीको साइबर जीटीएस ‘कन्सेप्ट’ले भविष्यको साइबरस्टर रोडस्टर गाडीको प्रतिनिधित्व गरेको कम्पनीको भनाइ छ । आर्कषक र फरक डिजाइन भएको यो गाडीले ईभीप्रति आममानिसको अपेक्षालाई परिस्कृत गर्ने एमजीको दाबी छ ।

एमजी मोटर्स बेलायत (यूके)का प्रवक्ताले साइबर जीटीएस कन्सेप्टले विद्युतीय गाडीको युगलाई फरक तरिकाले परिभाषित गर्न खोजेको बताएका छन् । यो गाडी दिगो प्रविधि र उत्कृष्ट उत्पादनप्रति कम्पनीको लगावको नतिजा भएको उनको भनाइ छ ।

कम्पनीले सन् २०२५ को सुरुवातमै गाडीलाई बजारमा सार्वजनिक गर्ने जनाएको छ । एमजी नेपालको आधिकारिक वितरक पारामाउन्ट मोटर्सले यो मोडललाई चाँडै नेपाल भित्र्याउने बताएको छ ।