काठमाडौं । चितवनको भरतपुर महानगरपालिका–२९, सिमलतालमा गेग्य्रान बहावले बगाई त्रिशूली नदीमा खसेका दुई बस र तीनमा रहेका यात्रुको खोज तथा उद्धारकार्य जारी छ ।

राष्ट्रिय विपद् जोखिम न्यूनीकरण तथा व्यवस्थापन प्राधिकरणका अनुसार, बेपत्ता यात्रुमध्ये सोमबार बिहानसम्म ११ जनाको शव भेटिएको छ । भेटिएका मध्ये पाँच शवको सनाखत भएको प्राधिकरणले जनाएको छ ।

यही असार २८ गते वीरगन्जबाट काठमाडौंतर्फ आइरहेको वाग्मती प्रदेश ०३–००६ ख १५१६ नम्बरको एन्जल डिलक्स र काठमाडौंबाट गौरतिर जाँदै गरेको वाग्मती प्रदेश ०३ ००१ ख २४९५ नम्बरको गणपति डिलक्स बसलाई सिमतालमा गेग्य्रान बहावले बगाउँदा त्रिशूलीमा खसेका थिए ।

“हालसम्म चितवनका विकास परियार, सर्लाहीका रमितकुमार माझी, भारतका ऋषिपाल साह, जयप्रकाश ठाकुर र सजाद अन्सारीको शव सनाखत भएको छ,” प्राधिकरणले सोमबार जारी गरेको विज्ञप्तिमा उल्लेख छ ।

सुरक्षाकर्मीले तालिमप्राप्त गोताखोरसहित विभिन्न आधुनिक उपकरणको प्रयोग गर्दै घटनास्थलदेखि ४० किलोमिटर तल गण्डक बाँधसम्म खोजीकार्य गरिरहेका प्राधिकरणले जनाएको छ ।

खोजीकार्यमा ५०० भन्दा बढी सुरक्षाकर्मी, २८ जना तीव्र बहाव भएका नदीमा खोजी गर्न सक्ने तालिमप्राप्त गोताखोर सक्रिय छन् ।

यस्तै, खोज तथा उद्धारमा एयर ड्रोन, वाटर ड्रोन, सोनार क्यामेरा, बाइनाकुलर टेलिस्कोप, शक्तिशाली चुम्बक, बोटलगायत उपकरणको प्रयोग गरिएको छ ।

गृह मन्त्रालयका सचिव एकनारायण अर्यालसहितको उच्चस्तरीय टोलीले आइतबार खोजी तथा उद्धारकार्यको स्थलगत अवलोकन गरेको थियो । त्यसक्रममा उनीहरूले घटनास्थलमा पुगी पीडित परिवारका सदस्य र उद्धारकार्यमा खटिएका अधिकारी एवं सुरक्षाकर्मीसँग पछिल्लो अवस्थाबारे जानकारी लिएका थिए ।

बसबाट हाम फाली बाँच्न सफल तीन यात्रुमध्ये सामान्य घाइते दुईजना प्राथमिक उपचारपछि ‘डिस्चार्ज’ भएका छन् । एकजनाको शल्यक्रिया गरिएको छ ।

स्थानीय प्रशासनले परिवारजनसँग सम्बन्ध स्थापित गर्ने र भेटिएका शवको पहिचान गर्ने गराउने कार्य गरिरहेको छ ।

पीडित परिवारजनलाई स्थानीय होटेल व्यवसायीसँगको समन्वयमा निःशुल्क खाना र बासको व्यवस्था गरिएको छ ।

“नदीमा पानीको बहाव उच्च र तीव्र हुनु एवं पानी धमिलो हुनुका बाबजुद खोजीकार्यलाई थप आधुनिक उपकरणसहित तीव्रता दिइएको छ,” प्राधिकरणको विज्ञप्तिमा उल्लेख छ ।