काठमाडौं । त्रिशूली नदीमा हराइरहेको बस र यात्रुको खोजी गर्न उच्च प्रविधिको सोनार डिभाइस प्रयोग गरिएको छ । चितवनको सिमलतालमा गएको शुक्रबार पहिरोसँगै त्रिशूली नदीमा खसेर बेपत्ता भएका दुई बस र यात्रुको खोजी गर्न सोमबार बिहानबाट उच्च प्रविधिको डिभाइस प्रयोग गरिएको हो । 

सशस्त्र प्रहरी बल नेपाल प्रधान कार्यालय हलचोकबाट आइतबार कुरिनटार लगिएको सो डिभाईसमार्फत खोजीकार्य सुरु गरिएको डीएसपी एवं सहप्रवक्ता शैलेन्द्र थापाले जानकारी दिए । 

नेपालमा भएको मध्ये उच्चस्तरको मानिने सोनार प्रविधि पानीमुनि साउन्ड वेभ पठाइ त्यहाँ रहेका वस्तुहरूलाई स्क्यान गरी आकृतिको रूपमा देखाउने प्रविधि हो । यसअघि पनि सशस्त्र प्रहरी बल नेपाल विपद् व्यवस्थापन तालिम शिक्षालय कुरिनटारबाट सो प्रविधि प्रयोग गरिएको भए पनि त्यसको क्षमता कम भएकोले अपेक्षाकृत परिणाम प्राप्त हुन सकेको थिएन । तर, सोमबार प्रयोग गरिएको सोनार डिभाइस उच्चतम प्रविधिको साधन हो । यसको क्षमता २०० मिटर गहिराइसम्मको जुनसुकै वस्तु पनि पत्ता लगाउने रहेको छ ।

धमिलो पानीमा पनि काम गर्नसक्ने प्रभावकारी मानिएको यो प्रविधिबाट पानीमा फालिएको साउन्ड वेभ तलसम्म रहेका वस्तुसम्म पुगेर स्क्यान गरी आकृतिको रूपमा फिर्ता हुने प्रकारको रहेको छ । मोटर बोटमा जडान गरी लामो दुरीको क्षेत्रफलमा पानीमुनि रहेका सम्पूर्ण वस्तुहरूको आकृति कम्प्युटरमा हेर्न सकिन्छ । यो प्रविधिबाट सफलता मिल्ने विश्वास समेत सशस्त्र प्रहरी बल नेपाल मुख्यालयले गरेको छ ।