काठमाडौं । नेकपा माओवादी केन्द्र नेतृत्वको गठबन्धन तोडेर कांग्रेस–एमाले गठबन्धन बनेसँगै  पुष्पकमल दाहाल प्रचण्डको सरकार ढलेको छ । सरकार ढलेसँगै राष्ट्पति रामचन्द्र पौडेलले संविधानको धारा ७६ (२) अनुसारको सरकारका लागि तीन दिन म्याद तोकेर आह्वान गर्दा एमाले अध्यक्ष केपी शर्मा ओलीले मात्र दाबी प्रस्तुत गरेका छन् । अन्य दाबी नआएको भन्दै आइतबार (आज) बिहान नियुक्तगरी दिउँसो शपथ गराउने तयारीमा राष्ट्रपति कार्यालय छ ।

कांग्रेस र एमालेको मात्र हस्ताक्षरमा बन्न लागेका प्रधानमन्त्रीले यो सरकारलाई दुईतिहाइको बनाउने प्रयत्न जारी राखेका छन् । त्यही प्रयत्न सफल पार्न कांग्रेसले पाउने भनिएका १० मन्त्रालयमा दुई र एमालेले पाउने भनिएका ९ मन्त्रालयमध्ये दुई घटाएर साना दलको भाग बढाइदिने समझदारी कांग्रेस सभापति देउवासँग गरेका छन् ।

योसँगै कांग्रेसमा आन्तरिक सन्तुलनको समस्या परेको छ । १० मन्त्रालय पाउदा चार डा. शेखर कोइराला समूहको भागमा छुट्टाउन तयार भएका  देउवा अहिले दुईमा मिलाउन शेखरसँग अनुरोध गरिरहेका छन् । तर, शेखरले मानिरहेका छैनन् ।

नेपाली कांग्रेसले पाउने मन्त्रालयको पनि अहिलेसम्म टुंगो लागेको छैन । तर, दुवैतर्फ समान्य खाका भने तयार भएको छ।

पूर्वमहामन्त्री प्रकाशमान सिंहको नेतृत्वमा देउवाले  सरकारमा पठाउँदै छन् । त्यसबाहेक संस्थापनबाट गृहमन्त्रालयसहित रमेश लेखक जानेछन् भने सहमहामन्त्री किशोरसिंह राठौरलाई पनि सकारमा पठाउने तयारी रहेको एक नेताले जानकारी दिए । ती नेताका अनुसार त्यसबाहेक नेपाली कांग्रेसका सभापति शेरबहादुर देउवाकी पत्नी आरजु राणा देउवा पनि सरकारमा जाने छन् ।

देउवाले सांसद अजय चौरासियालाई पनि मन्त्री बनाउने ती नेताको भनाइ छ । कांग्रेस सभापति देउवाले पूर्वमहामन्त्री डा. शशांक कोइरालाको कोटामा दिपक खडकालाई मन्त्री बनाउन लागेको ती नेताले जानकारी दिए । उपसभापति पूर्णबहादुर खड्काको एकमात्र सिफारिसमा संसद्को राज्यव्यवस्था तथा सुशासन समितिको सभापति समेत रहेका सांसद रामहरि खतिवडाको नाम परेको छ । त्यो सिफारिस देउवा सहमत भएमा खतिवडा मन्त्री बन्नेछन् ।

उता संस्थापनइतरबाट भने सहमहामन्त्री बद्री पाण्डे र जीवन परियारमध्ये एक, हृदयराम थानी, रामनाथ अधिकारी र दिपक गिरीमध्ये एकलाई सरकारमा पठाउने गृहकार्य भएको छ । शेखर पक्षका एक नेताका अनुसार यो पक्षबाट तेजुलाल चौधरी र सरिता प्रसाईंमध्ये एकजना मन्त्री बन्नेछन् ।

संस्थापनइतरका अर्का नेताका अनुसार महामन्त्री गगन थापा मन्त्री नबन्ने भनेकाले उनले शेखर समूहमा एक मन्त्री छान्ने छन् । प्रदीप पौडेललाई मन्त्री बनाउने गगनको प्रस्तावमा शेखर सहमत भइसके पनि देउवा असहमत देखिएका छन् । त्यसैले अन्तिममा त्यो कोटामा अर्जुननरसिंह केसी मन्त्री बन्न सक्ने ती नेताको बुझाइ छ ।