काठमाडौं । गए राति चितवनको भरतपुर महानगरपालिका–२९ स्थित नारायणगढ–मुग्लिन सडकखण्डको सिमलतालमा गएको पहिरोमा परी दुई यात्रु बस बेपत्ता छन् ।

वीरगन्जबाट काठमाडौं आउँदै गरेको वाग्मती प्रदेश ०३–००६ ख १५१६ नम्बरको एन्जल डिलक्स बस र काठमाडौंबाट गौर जाँदै गरेको गणपति लेखिएको वाग्मती प्रदेश ०३–०११ ख २४९५ बेपत्ता भएका हुन् ।

दुवै बसमा सवार यात्रुको यकिन संख्या अझै खुलेको छैन । तर, काठमाडौं आउँदै गरेको बसमा ४१ जना र काठमाडौंबाट गौर जाँदै गरेको बसमा २७ जना रहेको सुरक्षा निकायको प्रारम्भिक अनुसन्धानका क्रममा खुलेको छ । गौर जाँदै गरेको बसको झ्यालबाट हाम फालेका तीन जना सकुशल छन् ।

उपत्यका ट्राफिक प्रहरी कार्यालय नागढुंगाले राखेको रेकर्डअनुसार काठमाडौंको नयाँ बसपार्कबाट गौरका लागि छुटेको रात्रि बस काठमाडौं छोड्दा ८ बजेर ३० मिटनेमा नागढुंगा पार भएको देखिएको ट्राफिक कार्यालयका अपरेसन कमान्डर सुनिलजंग शाहले जानकारी दिए ।

उक्त बस काठमाडौंबाट ११७ किलोमिटरको दुरी पार गरेपछि भने सिमलतालको पहिरोमा परेको हो । चितवन प्रहरीका अनुसार पहिरो राति साढे ३ बजेको समयमा गएको थियो ।

उक्त बसले ११७ किलोमिटरको दुरी पार गर्न आठ घण्टा लगाउँदा पहिरोमा परेको हो । सामान्य अवस्थामा काठमाडौंबाट नारायणघाट पुग्न पाँचदेखि ६ घण्टा लाग्छ ।

तर, नारायणघाट पुग्नुअघि नै बस पहिरोमा परेको हो । चितवन प्रहरीका (डीएसपी) भेषराज रिजालका अनुसार निर्माणाधीन नारायणगढ–मुग्लिन सडकखण्ड र वर्षाका कारण पछिल्लो सयम नारायणगढ–मुग्लिन सडकखण्ड पार गर्न आठ देखि १० घण्टा लाग्दै आएको छ ।