काठमाडौं । नेकपा (एमाले)ले प्रधानमन्त्री पुष्पकमल दाहाल ‘प्रचण्ड’लाई राजीनामा दिन संसद्‌बाटै माग गरेको छ । आइतबारको प्रतिनिधिसभा बैठकको शून्य समयमा बोल्दै एमाले प्रमुख सचेतक महेश बर्तौलाले मार्गप्रशस्त गर्न प्रधानमन्त्री प्रचण्डको ध्यानाकर्षण गराए । 

एमाले र कांग्रेस राष्ट्रिय सहमतिको सरकार बनाउन सहमत भएको भन्दै प्रधानमन्त्री प्रचण्डको राजीनामा मागेका हुन् । “वर्तमान सरकारले बहुमत गुमाएको छ । बहुमत गुमाएको सरकार पदमा रहिरहन अनुचित हुन्छ । नेपाली कांग्रेस र नेकपा (एमाले) बीचमा नयाँ राष्ट्रिय सरकार बनाउने सहमति भएको छ । यो अभियानलाई सहयोग गर्न मार्ग प्रशस्तका लागि प्रधानमन्त्रीलाई आग्रह गर्छु,” उनले भने । 

एमालेका सांसद सूर्यप्रसाद ढकालले पनि सरकार अल्पमतमा परेको भन्दै मार्ग प्रशस्त गर्न अनुरोध गरे । “सरकार अल्पमतमा परेको हुनाले छिटोभन्दा छिटो राजीनामा दिएर मार्ग प्रशस्त गर्न अनुरोध गर्न चाहन्छु,” उनले भने । 

एमालेका सांसद रघुजी पन्तले अल्पमतमा परेपछि प्रधानमन्त्रीले राजीनामा दिएर बाटो फुकाउनुपर्ने बताए । अल्पमतमा परेपछि ७६ (२) मा जान्छ कि ७६ (३) मा जान्छ, त्यो राष्ट्रपतिको चिन्ताको विषय हो । उहाँको काम भनेको बहुमत नभएपछि तत्काल राजीनामा दिएर बाटो फुकाउने हो,” उनले भने । 

बिहान बसेको एमाले संसदीय दलको बैठकले प्रधानमन्त्री प्रचण्डलाई तत्काल राजीनामा दिन आग्रह गरेको थियो । उसले सरकार अल्पमतमा रहेकाले कुनै पनि निर्णय नगर्न ध्यानाकर्षण गराएको छ । एमाले र नेपाली कांग्रेसबीच सत्ता साझेदारीको सहमति भएसँगै एमालेले मन्त्री फिर्ता गरी सरकारलाई दिएको समर्थन फिर्ता लिइसकेको छ । प्रधानमन्त्रीले असार २८ गते सदनमा विश्वासको मत लिने तयारी गरेका छन् ।