काठमाडौं । राष्ट्रिय स्वतन्त्र पार्टी (रास्वपा)का महामन्त्री डा. मुकुल ढकालको एउटा तस्बिर आज (बुधबार) भाइरल बनेको छ । तस्बिरमा उनी पार्टी सभापति रवि लामिछानेसँगै बसेका छन् । तस्बिर बुधबार भएको रास्वपा केन्द्रीय समितिको बैठकका क्रममा लिइएको हो । 

तस्बिरमा ढकालले मुखमा मास्क लगाएका छन् । मास्कको बाहिरी भागमा उनले क्रस चिह्न हुनेगरी कालो टेप लगाएका छन् । आफ्नो बोल्ने अधिकार हनन् भएको भन्दै ढकालले विरोध स्वरुप मुखमा कालो टेप लगाएका हुन् । 

बुधबार भाइरल भएको ढकालको तस्बिरले तीन वर्षअघिको रामकुमारी झाँक्रीको एक तस्बिर सम्झाइ दिएको छ । सामाजिक सञ्जालमा आज केहीले ढकाल र झाँक्रीको तस्बिर एकै ठाउँमा जोडेर ‘ती झाँक्री, यी डाक्टर’ भन्दै पोष्ट पनि गरेका छन् । 

२०७७ माघ २८ गते तत्कालीन नेकपा नेतृ (हाल नेकपा (एकीकृत समाजवादी)) झाँक्रीले भृकुटीमण्डपमा आयोजना गरिएको विरोध कार्यक्रमलाई सम्बोधन गर्ने क्रममा मुखमा टेप लगाएर स्टेजमा गएकी थिइन् । 

तत्कालीन प्रधानमन्त्री तथा नेकपाका अध्यक्ष केपी शर्मा ओलीले संसद् विघटन गरेपछि त्यसको विरोधमा पुष्पकमल दाहाल ‘प्रचण्ड’ र माधव नेपाल पक्षले आमसभाको आयोजना गरेको थियो । 

आमसभालाई सम्बोधन गर्ने क्रममा नेतृ झाँक्रीले मुखमा लगाएका टेप खोलेर भाषण गरेकी थिइन् । उनले टेप खोल्नुअघि ‘प्रतिगमन मुर्दावाद’ लेखिएको कपडा शरीरबाट झिकेर फालेकी थिइन् । 

मुखमा मास्क लगाएर स्टेजमा पुगेकी झाँक्रीले भाषण गर्नुअघि मास्क झिकेर फालेकी थिइन् । त्यसपछि उनको मुखमा लगाएको टेप देखिएको थियो । मुखमा लगाएको टेप उप्काएर फाल्दै उनले भनिन्, “बोल्न पाइन्छ । हामी बोल्न जन्मिएका हौँ ।” 

झाँक्रीले तत्कालीन राष्ट्रपति विद्यादेवी भण्डारी र ओलीको आलोचना गरेपछि ओली पक्षधर नेताहरूले आपत्ति जनाएका थिए । त्यसपछि उनी मुखमा टेप लगाएर भृकुटीमण्डपको मञ्चमा देखिएकी थिइन् । 

झाँक्रीझै ढकाल पनि आज रास्वपाको केन्द्रीय समिति बैठकमा प्रस्तुत भएका थिए । उनको उदेश्य पनि उस्तै थियो– बोल्न पाउनुपर्छ । 

रास्वपाका सह–प्रवक्ता मनिष झाका अनुसार बैठकमा एकजना केन्द्रीय सदस्यलाई बोल्नका लागि सात मिनेट समय दिइएको थियो ।

बैठकको सुरुमा नै सभापति रवि लामिछानेले महामन्त्रीको प्रतिवेदन लाइभ गर्ने प्रस्ताव राखेका थिए । “सुरुमा पार्टी सभापतिले महामन्त्रीको अनुरोधअनुसार लाइभ गर्ने प्रस्ताव गर्नुभयो । तर, प्रतिवेदन सभापतिबाहेक कसैले हेरेका थिएनौँ,” उनले भने ।

तर, केन्द्रीय सदस्यहरूले पहिला केन्द्रीय समितिमा वाचन गर्ने र सबैले आफ्ना धारणा राखेपछि सार्वजनिक गर्नुपर्ने अडान लिएको उनले बताए । महामन्त्रीले लाइभ नगरे स्वतन्त्रताको हनन् भएको भन्दै मुखमा कालो टेप लगाएर बसेको सह–प्रवक्ता झाले जानकारी दिए । 

“महामन्त्रीज्यूले लाइभ गरिँदैन भने मेरो व्यक्तिगत स्वतन्त्रताको हनन् हो । त्यसैले गर्दा मुखमा कालो टेप लगाएर बस्छु भन्नुभयो । र, कालो टेप लगाउनुभयो,” उनले भने ।