काठमाडौं । बलिउड सुपरस्टार आमिर खानका छोरा जुनैद खानलाई डेब्यू सिनेमाबाटै झड्का लागेको धेरैले महसुस गरेका थिए, जतिबेला अदालतले यो सिनेमालाई प्रदर्शनमा अस्थायीरूपमा रोक लगाइदियो । 

जुनैदको अभिनय रहेको चलचित्र ‘महाराज’लाई गुजरात हाई कोर्टले प्रतिबन्ध लगाएपछि पहिलो सिनेमाबाटै उनले झड्का बेहोर्नुपरेको हो । 

जुनबेला जुनैदले फ्यानहरूबाट बधाई पाइहेका थिए, त्यहीबेला अदालतले प्रदर्शनमा अस्थायीरूपमा रोक लगाएको समाचार आएका थिए । त्यसपछि यो फैसलाले उनको करिअरलाई असर गर्छ कि गर्दैन भनेर बहस सुरु भयो । बहसमा धैरेले सहभागिता जनाए, खासगरी सामाजिक सञ्जालमा । 

तर, जब गुजरात हाई कोर्टले 'क्लिन चिट' दियो, सिनेमा नेटफ्लिक्समा रिलिज भयो । जुनैदको करिअर के होला भनेर अनेक अड्कलबाजी भइरहेका बेला उनको अभिनयको तारिफ सुरु भयो । गाली तारिफमा परिणत भयो ।  

रिलिजअघि धेरैले कठिनाइको सामना गर्नुपरे पनि प्रदर्शनपछि दर्शकको माया पाइरहेको छ ।  

किन भयो विरोध ?

‘महाराज’ले धार्मिक आस्थामाथि ठेस पुर्‍याएको भन्दै भगवान् कृष्ण र वल्लभाचार्यका भक्तहरूले यसबारे निवेदन दिएका थिए । हिन्दु संगठनको आपत्तिपछि फिल्मलाई अस्थायीरूपमा प्रतिबन्ध लगाइएको थियो ।

सिनेमा १८६२ को लिबेल महाराज प्रकरणमा आधारित रहेको रिटमा उल्लेख थियो । सिनेमाले हिन्दु धर्ममा पनि चोट पुर्‍याएको दाबी रिटमा गरिएको थियो । यो सिनेमाले भारतको एक महत्त्वपूर्ण कानुनी मुद्दाको कथा उठान गरेको छ ।

‘बोइकट नेटफ्लिक्स’, ‘ब्यान्ड महाराज फिल्म’, ‘आमिर खान’लगायत ह्यासट्यागसमेत एक्समा चले । हिन्दु अभियानकर्ताहरूले आफ्नो असन्तुष्टि सामाजिक सञ्जालमा व्यक्त गरेका थिए । सिनेमामा हिन्दु धर्मलाई लिएर नकारात्मक दृश्य रहेको उनीहरूको आरोप थियो । 

निर्देशकको दुःख

विभिन्न व्यक्तिले आमिर खानले सनातन धर्मविरुद्ध आफ्नो छोरालाई प्रयोग गरेको आरोप लगाएका थिए । सिद्धार्थ पी मल्होत्राको निर्देशन रहेको सिनेमा १८७२ को महाराज लिबेल ‘केस’ (मुद्दा) बाट प्रेरित भएर बनाइएको छ ।

यसअघि २०२२ मा आमिर खानको ‘लाल सिंह चड्डा’समेत यस्तै खालको विवादमा तानिएको थियो । सन् २०१५ मा आमिर खानले हिन्दु धर्मबारे नकारात्मक टिप्पणी गरेपछि उनका सिनेमा बहिष्कार गर्न धेरैले दबाब दिएका थिए ।

त्यसैले सिद्धार्थ पी मल्होत्राले एक साक्षात्कारमा सिनेमा रिलिज नहुँदासम्म आफू हरेक पल रोएर बिताएको बताएका थिए । कुनै पनि धर्ममा ठेस पुर्‍याउने नियत नराखे पनि आरोप आएपछि आफू सिनेमाको अक्षर–अक्षर सम्झिएर रोएको उनले सञ्चारमाध्यमसँग बताएका थिए । आमा, बुवा र आफन्त घरमै आएर केही हुँदैन भनेर आफूलाई सम्झाएको उनले स्मरण गरेका थिए । 

समीक्षा र अभिनय

एनडीटीभी इन्डियाले सिनेमाको समीक्षा गर्दै ३.५ स्टार दिएको थियो । 

‘आमिर खानलाई मिस्टर परफेक्सनिस्ट भनिन्छ । यस्तो अवस्थामा उनका छोरा जुनैदबाट अभिनयमा धेरै अपेक्षा थियो । पहिलो नजरमा जुनैद खान अभिनयको परीक्षा पास गर्छन्,’ समीक्षामा जुनैदको अभिनयलाई लिएर एनडीटीभीले लेखेको छ, ‘उनले आफ्नो अभिव्यक्तिमा राम्रो काम गरेका छन् र चरित्रको गहिराइमा गएका छन् ।’ 

तर, उनको संवादमा रंगमञ्चको प्रभाव हाबी भएको समीक्षामा उल्लेख छ । उनले अलिकति रंगमञ्चको दुनियाँबाट बाहिर आएर सिनेमाको आत्मालाई समात्नुपर्ने देखिएको टिप्पणी गरिएको छ । उनी रंगमञ्चबाट आएका कलाकार हुन् । 

आमिरको प्रतिक्रिया

आमिर खानले जुनैदलाई राम्रो काम गरेको प्रतिक्रिया दिएको बताइएको छ । जुनैद अमिरको जेठो सन्तान हुन् । दर्शकले जुनैदको अभिनयको प्रशंसा गरिरहेका बेला आमिरले छोराको सिनेमा मन परेको बताएको भारतीय सञ्चारमाध्यमा जुनैदलाई उदृत गर्दै समाचारहरू आएका छन् । 

तर, उनले आमिर अरूको सिनेमा र कामप्रति खासै टिप्पणी नगर्ने गरेको बताएका छन् । उनले अरूका सिनेमालाई एक आम दर्शकको नजरबाट मात्र हेर्ने र नकारात्मक टिप्पणी नगर्ने गरेको बताएका छन् । 

यसको कारण पनि छ, उनीसँग सिनेमा कस्तो छ, कुन पक्ष सवल र कमसल छ भनेर हेर्न थाले चलचित्रको आनन्द लिन नसकिने उनको तर्क छ । त्यसैले अरूको सिनेमालाई आमिरले दिने प्रतिक्रिया सधैँ एउटै छ । र, त्यो हो– राम्रो छ ।

१४ जुनदेखि नेटफ्लिक्समा स्ट्रिमिङ भइरहेको ‘महाराज’ रिलिज अगाडि मेकर्सले आमिरलाई देखाएका थिए । उनले केही सुझाव पनि दिए । यस सन्दर्भमा जुनैदले भनेका छन्, “मेकर्सले बुवालाई यो फिल्म देखाएका थिए । धेरै डिस्कसन हुन पाएन । केही सुझाव भने दिनुभएको थियो । तर मेकर्सले केही माने, केही बेवास्ता गरिदिए ।” 

सिनेमाको छायांकन सन् २०२१ फेब्रुअरीमा सुरु भएको थियो । तर, कोरोना भाइरसको दोस्रो लहर फैलिएसँगै रोकिएको थियो । पछि कोरोना संक्रमण घट्दै गएपछि टिमले पुनः छायांकन गरेर  निर्माण सम्पन्न गरेको थियो । 

सिनेमामा जुनैदसँगै जयदीप अह्लावत र शालिनी पाण्डेको मुख्य भूमिका छ ।