काठमाडौं । प्रधानमन्त्री पुष्पकमल दाहाल ‘प्रचण्ड’ र नेकपा (एमाले)का अध्यक्ष केपी शर्मा ओलीबीच सोमबार करिब तीन घण्टा लामो छलफल भयो । प्रधानमन्त्रीको सरकारी निवास बालुवाटारमा बिहान ९ देखि मध्याह्न १२ः३० बजेसम्म छलफल भएको हो ।

सरकारका काम–कारबाहीलाई अझ सशक्त बनाउने विषयमा छलफल भएको प्रधानमन्त्रीका प्रेस सल्लाहकार गोविन्द आचार्यले जानकारी दिए । “उहाँहरूबीच सरकार सञ्चालन र समसामयिक विभिन्न विषयमा छलफल भयो । अझै प्रभावकारी ढंगले काम गर्ने, यो सत्तासमीकरण मिसन ०८४ सम्म लैजाने उद्देश्यले भएको हो, त्यसैले अझै बलियो बनाएर लैजाने कुरा भएको छ,” उनले बाह्रखरीसित भने ।

संक्रमणकालीन न्यायसम्बन्धी विधेयक (टीआरसी), संसद्को प्रभावकारितालगायत राष्ट्रिय मुद्दामा सबै दलसँग संवाद बढाएर जाने विषयमा छलफल भएको उनले बताए । उनले बाहिर हल्ला भएजस्तो समीकरण नभत्कने जिकिर गरे ।

“हल्ला त केहीको एजेन्डा हो । सरकार कमजोर धरातलमा बनेको होइन, कोही आएर केही दिन्छु भनेर भत्किने । त्यो अवस्था हिजो पनि थिएन र आज पनि छैन । यसमा दुई नेताबीच कुनै आशंका नै छैन । बाहिर आशंका भएको हो,” आचार्यले भने ।

उनले बाहिरका हल्ला केही घण्टा पनि नटिकेको र त्यसको औचित्य समेत नरहेको बताए ।

• नयाँ गठबन्धन बनाउने गृहकार्यमा कांग्रेस–एमाले, के कारण नजिकिए ?