काठमाडौं । पूर्वसभामुख तारानाथ रानाभाटले देशलाई राम्रोसँग अघि बढाउने नेताको खाँचो रहेको बताएका छन् । आइतबार संसद् भवनमा ६६औँ संसद् दिवसको अवसरमा आयोजित कार्यक्रममा उनले यस्तो बताएका हुन् ।

उनले मुलुक मुखियाले गाउँ चलाएजस्तो नभएको टिप्पणी गरे । नेपाल चलाउनु मात्र नेता, सरकार, प्रधानमन्त्रीको जिम्मेवारी नभएको उनले उल्लेख गरे । संसारभरका आफ्ना मित्र, छिमेकी, विगत र आजका क्रियाकलाप एवं शासनव्यवस्था र पद्धति अध्ययन गरेर काम गर्नुपर्ने उनको भनाइ थियो ।

पूर्वसभामुख रानाभाटले सांसदहरू संसद्मा आइसकेपछि कुनै जिल्ला, क्षेत्र र पार्टीको मात्र नहुने बताए ।

संसद् दिवसको कार्यक्रममा तारानाथ रानाभाटको भनाइ पढ्नोस्–
प्रजातन्त्र अहिले पनि लंगडो अवस्थामै छ । तातेताते गरिदिने गम्भीर व्यक्तित्वहरू, नेताहरूको अभावले यो स्थिति आएको हो । हामीलाई औँला समातेर अगाडि बढाइदिने नेताको आवश्यक छ । किन आवश्यक छ भने मुलुक मुखियाले गाउँ चलाएको जस्तो होइन । नेपाल चलाउनु मात्रै नेताहरूको, सरकारको, प्रधानमन्त्रीको जिम्मेवारी होइन । संसारभर रहेका आफ्ना मित्रहरू, आफ्ना छिमेकीहरू, आफ्नो व्यवस्थासँग व्यवस्था मिल्ने पद्धतिका हिजोका क्रियाकलाप र आजका क्रियाकलापहरू र आफ्नो अनुकूल रहेका शासनव्यवस्था र पद्धतिलाई अध्ययन गरेर काम गर्ने कुरा संसद्भित्रै हुन्छ । जनताले चुन्ने हो । न्युज एजेन्सी नेपाल