काठमाडौं । जनमत पार्टीका अध्यक्ष डा. चन्द्रकान्त (सीके) राउतले ४३ प्रतिशत जनता गरिबीको रेखामुनि रहेको देशमा महिनाको १५ दिन पाँचतारे होटेलमा खाना खाने नेताले समाजवाद ल्याउन नसक्ने बताएका छन् । आइतबार काठमाडौंमा नेकपा (एकीकृत समाजवादी)को राष्ट्रिय महाधिवेशन उद्घाटनका क्रममा उनले यस्तो बताएका हुन् ।

महिनाको १५ दिन पाँचतारे होटेलमा खाना खान जाने नेताहरूले आफूलाई समाजवादी भन्न नसुहाउने उनले टिप्पणी गरे । उनले कर्णाली प्रदेशका नागरिकले बिरामी हुँदा सिटामोल नपाउने देशमा विदेशमा गएर उपचार गर्ने नेताहरू समाजवादी हुन नसक्ने बताए ।

नागरिकका छोराछोरी सरकारी अस्पतालमा जाने तर त्यहाँको गुणस्तर सुधार नगर्ने र आफ्ना सन्तानलाई निजी विद्यालयमा भर्ना गर्ने नेताहरू समाजवादी हुन नसक्ने उनको भनाइ थियो ।

अध्यक्ष राउतले समाजवादी बन्न हुनुपर्ने मापदण्ड नेताहरूले पालना गर्न नसकेको बताए ।

एकीकृत समाजवादीको महाधिवेशन उद्घाटनमा सीके राउतको भनाइ पढ्नोस्–
हामी समाजवादका कुरा गर्दछौँ । म महिनाको १५ दिनजति पाँचतारे होटेलमा गएर खाना खान्छु भने, जहाँ ४३ प्रतिशत जनता गरिबीको रेखामुनि बाँचिरहेका छन् भने म आफूलाई समाजवादी भन्ने कि नभन्ने ? जुन ठाउँमा कर्णालीमा मान्छे बिरामी हुँदा खाने कुरा हुँदैन, नुन पाइरहेका छैनन्, सिटामोल पाइरहेका छैनन्, म महँगो अस्पतालमा उपचार गराउँछु, विदेशमा गएर उपचार गराउन चाहन्छु, म समाजवादी हो कि होइन ? म एकातिर रोजगारी दिने कुरा गर्दछु, अर्कोतिर कसरी युवालाई विदेश पठाउने भनेर लाखौँको संख्यामा सम्झौता गर्दछु भने म समाजवादी हो कि होइन ? म आफ्नो छोराछोरीलाई महँगो बोर्डिङ स्कुलमा भर्ना गर्दछौँ, जहाँ अधिकांश विद्यार्थीको स्थिति राम्रो छैन, म समाजवादी हो कि होइन ? न्युज एजेन्सी नेपाल