![प्रधानमन्त्री प्रचण्ड–ओली र रविबीच भेटवार्ता](https://12khari.top/uploads/posts/prachanda_Oli_rabi--1718887464.jpg)
काठमाडौं । प्रधानमन्त्री पुष्पकमल दाहाल ‘प्रचण्ड’ र नेकपा (एमाले)का अध्यक्ष केपी शर्मा ओलीबीच सिंहदरबारमा भेटवार्ता भएको छ । सत्तारूढ दुई दलका नेताबीच आइतबार प्रधानमन्त्री तथा मन्त्रिपरिषद्को कार्यालय सिंहदरबारमा भेटवार्ता भएको हो ।
भेटवार्तामा समसामयिक राजनीतिक विषयमा छलफल भएको बताइएको छ । शनिबार (हिजो) ओलीको निवास बालकोटमा पुगेर नेपाली कांग्रेसका सभापति शेरबहादुर देउवाले भेटेको विषयमा पनि सामान्य कुराकानी भएको बताइएको छ ।
शनिबार देउवा र ओलीबीच बालकोटमा भेटवार्ता भएको थियो । त्यसपछि सत्तासमीकरणमा फेरबदल हुन लागेको आशंका गरिएको छ । तर, अध्यक्ष ओली अस्वस्थ भएका कारण देउवा भेटघाटका निम्ति गएका बताइएको छ ।
प्रधानमन्त्री प्रचण्डसँगको भेटपछि अध्यक्ष ओलीले भेटवार्ता भइरहने बताए । प्रधानमन्त्री र ओलीको भेटका क्रममा जोडिएका राष्ट्रिय स्वतन्त्र पार्टी (रास्वपा)का सभापति एवं उपप्रधान तथा गृहमन्त्री रवि लामिछानेले पनि नियमित प्रक्रिया भएको प्रतिक्रिया दिए । न्युज एजेन्सी नेपाल