काठमाडौं । राष्ट्रिय स्वतन्त्र पार्टी (रास्वपा)का सांसद शिशिर खनालले चीनसँग भएको बीआरआई सम्झौताबारे सदनमा औपचारिक छलफल नभएको बताएका छन् । 

मंगलबारको प्रतिनिधिसभा बैठकमा प्रधानमन्त्री पुष्पकमल दाहाल ‘प्रचण्ड’लाई प्रश्न गर्दै उनले सम्झौताबारे सदनमा छलफल नहुँदा बाहिर अनावश्यक र नकारात्मक चर्चा परिचर्चा हुने गरेको बताए । जसको असर चीनसँगको सम्बन्धमा पर्ने डर बढेको भनाइ उनको थियो ।

“छिमेकी मित्रराष्ट्र चीनसँग सन् २०१७ मा बीआरआई फ्रेमवर्क सम्झौता हस्ताक्षर गरेको तर, उक्त सहमति सम्झौता यस सदनमा औपचारिक छलफल नभएको हुँदा यसले अनावश्यक रूपमा बाहिर बढी चर्चा परिचर्चा हुने गरेको छ । जसले छिमेकी मित्र राष्ट्रसँगको सम्बन्धमा समस्या आउने देखिन्छ,” उनले भने । 

यस्तै, उनले वैदेशिक अनुदानतर्फ हरेक वर्ष ५० अर्ब जति भित्राउने लक्ष्य राखे पनि पाँच, ६ अर्ब मात्र भित्रने गरेको भन्दै यसवर्ष कस्तो नीतिगत र संरचनात्मक परिवर्तन गरेर सबै अनुदान भित्राउन सकिन्छ भनेर प्रश्न पनि उनले गरे । साथै उनले परराष्ट्र मन्त्रालयले अन्तर्राष्ट्रिय र भूराजनीतिक मामिलासम्बन्धी अध्ययन अनुसन्धान गर्न छुट्याएको रकम पाँच लाख कम भएको भन्दै यसलाई बढाउने नीति के छ भन्दै प्रश्न गरे ।