बैंकक । विकिलिक्सका संस्थापक जुलियन असान्ज सवार विमान थाइल्यान्डको बैंककमा अवतरण गरेको अनलाइन ट्रयाकर फ्लाइट राडारले जनाएको छ । उनी सवार विमान डोन म्युआङ अन्तर्राष्ट्रिय विमानस्थलमा अवतरण गरेको हो । यो स्थान थाइ राजधानी बैंककबाट उत्तर तर्फ रहेको छ ।

सो विमान तेल हाल्नका लागि मात्रै थाइल्यान्ड ल्याइएको हो वा नर्थन मेरिआना आइल्यान्डस्थित अदालतमा जानुअघि असान्जले अरु केही गर्दैछन् भन्ने बारेमा प्रष्ट भइसकेको छैन ।

चार्टर गरिएको सो विमान मंगलबार राति ९ बजे नर्थन मेरिआना आइल्यान्डतर्फ प्रस्थान गर्ने थाइ अधिकारीलाई उद्धृत गर्दै एएफपीले जनाएको छ ।

उनले अमेरिकी अदालतमा भोलि बिहान उपस्थित भएर गल्ती महसुस गर्नुपर्ने अमेरिकी प्रशासनसँग सहमति भएको जनाइएको छ । उनले यसअघि नै बेलायतमा पाँच वर्ष जेल जीवन बिताइसकेकोले उनी अमेरिकामा भने जेलमा बस्नु पर्ने छैन ।

उनी अमेरिकाको अदालती प्रक्रिया सकिएपछि अष्ट्रेलिया जाने कार्यक्रम रहेको छ । उनी बेलायती जेलबाट सोमबार छुटेका हुन् । 

उनीसँग अमेरिकी प्रशासनले गरेको सहमतिलाई लिएर अमेरिकाका पूर्व उपराष्ट्रपति माइक पेन्सले ट्वीट गर्दै ‘न्यायको गर्भपात’को संज्ञा दिएका छन् । उनले यसले देशको सशस्त्र फोर्समा भएका महिला र पुरुषको त्याग र सेवालाई अनादर गरेको उल्लेख गरेका छन् । द गार्जियन