काठमाडौं । नेपाली कांग्रेसका तर्फबाट राष्ट्रियसभा सदस्य कमला पन्तले उपप्रधान एवं गृहमन्त्री रवि लामिछानेले नैतिकताका आधारमा पदबाट राजीनामा दिनुपर्ने बताएकी छन् । सहकारीको बचत अपचलन प्रकरणमा अनुसन्धानका निम्ति संसदीय छानबिन समिति बनाइँदा समेत नैतिकताका आधारमा राजीनामा नदिएको भन्दै उनले असन्तुष्टि जनाएकी हुन् ।

सोमबार राष्ट्रियसभा बैठकमा उनले ‘छानबिनका लागि प्रक्रियामा गएका व्यक्तिलाई संरक्षण गरेर देशमा कस्तो सन्देश दिन खोजेको ?’ भन्दै प्रश्न गरिन् । प्रधानमन्त्री पुष्पकमल दाहाल ‘प्रचण्ड’ सत्तामा बढी केन्द्रित भएको उनले आरोप लगाइन् ।

राष्ट्रियसभा बैठकमा सांसद कमला पन्तको भनाइ पढ्नोस्–
जनताले यसले अनियमितता गर्‍यो, जनताको पैसा यसको पेटमा पर्‍यो, त्यसले गर्दा कारबाही होस् भनेर जनताले मागेको छ । सिंगो संसद्ले मागेको छ । सिंगो संसद् अवरुद्ध भयो । र, अध्यक्षज्यूलाई भन्छु– यो संसद्‌बाट हामी पनि संसद् अवरुद्ध गर्न वेलमा आयौँ । के गर्‍यौँ, त्यो पछि विश्लेषणको कुरा होला । त्यत्रो भएको मान्छे नैतिकता त हुन्छ नि ! छानबिन गर्नुस्, राजीनामा दिन्छु भन्न नसक्ने त्यत्रो ठूलो निकायमा बसेको एउटा गृहमन्त्रीले, अनि भ्रष्टाचार मौलाउँदैन ? हामीले कस्तो मान्छेलाई संरक्षण दिएका छौँ ? म सम्माननीय प्रधानमन्त्रीलाई भन्छु– यहाँबाट निकाल्न सकिँदैन ? अभियोग यस्तो लाग्यो, राजीनामा दिनुस्, क्लिन चिट पाएपछि तपाईंलाई नै उपप्रधानमन्त्री बनाउँछु भनेर प्रधानमन्त्रीले भन्न सक्नु हुन्न ? केले रोक्यो, त्यत्रो इच्छाशक्ति बोकेको प्रधानमन्त्रीलाई ? सत्ता नै ठूलो कुरा हो ? आउनुस् न, अर्कोचोटि बहुमत प्राप्त गरेर आउनुस् । सत्ता ठूलो कि मुलुक ? न्युज एजेन्सी नेपाल