काठमाडौं । नेपाली कांग्रेसका सांसद डा. प्रकाशशरण महतले अहिलेको सरकार देश र जनताको पक्षमा नरहेको टिप्पणी गरेका छन् ।

बिहीबार संसद् भवन परिसरमा सञ्चारकर्मीसँगको कुराकानीका क्रममा उनले आज प्रधानमन्त्रीले संसद्‌मा दिएको जवाफबाट सरकार देश र जनताप्रति जिम्मेवार नरहेको पुष्टि हुने जिकिर गरे ।

उनले कार्यविधिमा तीन करोडभन्दा तलको आयोजना केन्द्र सरकारले नराख्ने भनेको अवस्थामा किन राखिएको भन्दै प्रश्न गरे ।

"देश जनताको पक्षमा यो सरकार छैन । यसले सक्दैन । आजै प्रधानमन्त्रीको जवाफ, उहाँले के भन्दै हुनुहुन्थ्यो भने तीन करोडभन्दा तलका आयोजनाहरू, जुन कार्यविधिमा केन्द्रले नराख्ने भनिएको छ । केन्द्रमा राखिएको छ र त्यो प्रदेश र स्थानीयले गर्छ भन्नुभयो । एक करोडभन्दा तलका आयोजनामात्रै ५५ अर्बका छन् । तीन करोडभन्दा तलको खर्बौं नाघ्छ । त्यो सबै स्थानीय र प्रदेशले गर्ने हो भने केन्द्रमा किन राखेको ?," महतले भने ।

उनले नेपाली कांग्रेसबिना जिम्मेवारीपूर्ण ढंगबाट देशको विकास सम्भव नरहेको जिकिर गरे ।