काठमाडौं । ६० किलो सुन तस्करी प्रकरणको दोस्रो चरणको अनुसन्धान थालेको नेपाल प्रहरीको केन्द्रीय अनुसन्धान ब्युरो (सीआईबी)को खोजी सूचीमा रहेका थप एक चिनियाँ नागरिक पक्राउ परेका छन् । गए राति (असार २) काठमाडौंको बौद्धबाट उनलाई पक्राउ गरिएको हो । ती चिनियाँ नागरिकको साथबाट प्रहरीले ६ किलो सुन र ४८ लाख नेपाली रुपैयाँ बरामद गरेको छ ।

सुन प्रकरणमा जोडिएका केही आरोपित भारतबाट समेत पक्राउ परेको सीआईबीका प्रमुख एवं एआईजी श्यामलाल ज्ञवालीले जानकारी दिए । उनले बाह्रखरीसित भने, “उनीहरू हाम्रो खोजीकै सूचीका व्यक्तिहरू हुन् । खोजतलास गर्दै जादा गएको राति फेला परेका हुन् ।”

उक्त सुन केही दिनअघि नेपाल भित्र्याइएको आशंका प्रहरीले गरेको छ ।

दोस्रो चरणको अनुसन्धानका क्रममा हालसम्म १० जनालाई पक्राउ गरिएको छ । तीमध्ये चार भारतीय व्यापारी समेत छन् । भारतको गुजरातका वैजनाथ महादत्त गोयल, प्रशान्त गणेश वजवलकर, भारतकै महाराष्ट्रका सिद्धार्थ भनिने सिद्धनाथ अशेक गायकवाड र सोही ठाउँका दिनेश भनिने धीरज दिनेश वैटेलाई पक्राउ गरिएको हो ।

सुन तस्करी प्रकरणमा पक्राउ परेका नेपालीमा पर्साको वीरगन्ज महानगरपालिकाका सुरेन्द्रमान श्रेष्ठ, भक्तपुरको सूर्यविनायक नगरपालिकाका राजु खत्री र काभ्रेपलाञ्चोकको तेमाल गाउँपालिकाका कान्छामान लामा छन् । एक तिब्बती नागरिकलाई समेत सीआईबीको टोलीले बौद्धबाट नियन्त्रणमा लिएको छ ।

सरकारद्वारा गठित सुनको अवैध पैठारी (तस्करी) नियन्त्रणसम्बन्धी जाँचबुझ आयोगको प्रतिवेदनका आधारमा सीआईबीले दोस्रो चरणको अनुसन्धान थालेको थियो ।

गए राति पक्राउ परेका चिनियाँ नागरिक तस्करीको ‘माथिल्लो तह’का व्यक्ति रहेको एआईजी ज्ञवालीको दाबी छ । हाल सीआईबीले पक्राउ गरेका मध्ये अधिकांश लामो समयदेखि तस्करीमा लागेका व्यक्तिहरू भएको उनको भनाइ छ ।

गत वर्ष साउन २ गते सवारीसाधनको ‘ब्रेक सु’मार्फत हङकङ हुँदै नेपाल भित्र्याइएको ६० किलो सुन भन्सार पार गरेर बाहिरिँदै गर्दा सिनामंगलबाट राजस्व अनुसन्धान विभागको टोलीले नियन्त्रणमा लिएको थियो । पछि उक्त घटनाको अनुसन्धान गर्ने जिम्मेवारी सीआईबीले पाएको हो । पहिलो चरणको अनुसन्धान सकाएको सीआईबीले २९ जनालाई प्रतिवादी बनाएको थियो ।

अनुसन्धानका क्रममा सीआईबीले सोही समूहले रेडी ट्रेडसहित अरू विभिन्न ‘डमी’ कम्पनी खडा गरी ३६० किलोभन्दा बढी सुन तस्करी गरेको तथ्य खुलाएको थियो ।

पहिलो चरणमा पक्राउ परेकामाथि तीन अर्ब ५० करोड दुई लाख १६ हजार ५५२ रुपैयाँ बिगो कायम गरिएको थियो । पक्राउ गरिएकामा नौ चिनियाँ र २० नेपाली थिए । पुर्पक्षका निम्ति उनीहरूलाई जेल चलान गरिएको छ ।

तर, सीआईबीले पहिलो चरणको अनुसन्धानका क्रममा त्रुटि गरेको भन्दै जाँचबुझ आयोग गठन गरिएको थियो । पूर्वन्यायाधीश डिल्लीप्रसाद आचार्य नेतृत्वको आयोगले पाँच महिना लगाएर छानबिनको प्रतिवेदन चैत १ मा गृहमन्त्री रवि लामिछानेलाई बुझाएको थियो ।

उक्त प्रतिवेदनमा पहिलो चरणको अनुसन्धानमा त्रुटि गरेको औँल्याइएको थियो । प्रतिवेदनका आधारमा पहिलो चरणको अनुसन्धान गर्ने सीआईबीकी प्रमुख एवं एआईजी किरण बज्राचार्यसहितको टोलीलाई नै त्यहाँबाट हटाइएको थियो । त्यसपछि एआईजी ज्ञवालीलाई त्यहाँ पठाइएको हो ।