काठमाडौं । नेपाली कांग्रेसका महामन्त्री तथा सांसद विश्वप्रकाश शर्माले विपद् व्यवस्थापनमा स्थानीय तहको भूमिकालाई जोखिम न्युनीकरणसम्बन्धी संशोधित ऐन, २०७५ बमोजिम व्यवस्थित गर्न सरकारको ध्यानाकर्षण गराएका छन् । बिहीबार प्रतिनिधिसभाको शून्य समयमा बोल्दै उनले सरकारको ध्यानाकर्षण गराएका हुन् ।

वर्षाको समयमा बाढीपहिरो, आपतकालीन बैठक र दलहरूको वक्तव्य अनि संसद्‌मा सांसदहरूको ध्यानाकर्षणको दृश्य देखिने गरेको भन्दै उनले ध्यानाकर्षणका लागि बाढी नकुर्न आग्रह गरे ।  “वर्षाको समयमा हाम्रो देशमा तीनवटा दृश्य देखिने गरेको छ । पहिलो बाढी पहिरो, दोस्रो आपतकालीन बैठकहरू, तेस्रो दलहरूको वक्तव्य अनि संसद्‌मा सांसदहरूको ध्यानाकर्षण । यसपालि दृश्य बदलौँ । ध्यानाकर्षणका लागि बाढी नकुरौँ । बाढीपछि बैठक होइन, उद्धारमा जुटौँ,” उनले भने ।  

सांसद शर्माले जलवायु परिवर्तन, भौतिक विकासका लागि जंगलको विनाश र प्राकृतिक स्रोतको अव्यवस्थित उपयोग कारणले नेपाल प्राकृतिक प्रकोपले ग्रसित भएको बताए । भू–गर्भविद्हरूले औंल्याएका पहिरोको जोखिम वस्तीहरू स्थानान्तरण गर्ने दीर्घकालीन कार्ययोजना कार्यान्वयनमा तदारुकता राख्न उनले आग्रह गरे ।  

“आजको विकासको भोक मेट्न भोलिको पुस्ताले प्रकृतिको तिर्खा बेहोर्नुुपर्ने ढंगले अन्धाधुन्ध विनाश नियन्त्रण गरौँ । सम्माननीय सभामुख महोदयमार्फत म सम्बन्धित निकाय र सरकारको ध्यानाकर्षण गराउँछु,” सांसद शर्माले भने ।