काठमाडौं । भारतको नयाँ सेना प्रमुख लेफ्टिनेन्ट जनरल उपेन्द्र द्विवेदी हुने भएका छन् । भारत सरकारले मंगलबार जनरल मनोज पांडेको स्थान उनले लिने जनाएको हो । 

लेफ्टिनेन्ट जनरल द्विवेदीसँग चीन र पाकिस्तानसँगको सीमामा भएका विशेष अपरेसनको राम्रो अनुभव छ ।  हाल उनी भारतीय सेनामा भाइस चिफ अफ आर्मी स्टाफका रूपमा कार्यरत छन् । जनरल मनोज पांडेले जुन ३० बाट अवकाश पाउँदै छन् । 

वरिष्ठ सैनिक अधिकृतको आधारमा द्विवेदीलाई जनरल पांडेले अवकाश पाएपछि सेना प्रमुख बनाउने निर्णय भारत सरकारले लिएको हो । 

गत महिना भारत सरकारले जनरल पांडेको कार्यकाल एक महिना बढाएको थियो । समय थप नगरेको भए उनीले मे ३१ मा अवकाश पाइसकेका हुन्थे । अवकाशमा जान ६ दिन अगाडि उनको कार्यकाल एक महिना थपिएको थियो, जुन भारतमा एकदमै कम हुनेगर्छ । “सरकारले वर्तमान भाइस चिफ अफ आर्मी स्टाफको रूपमा कार्यरत लेफ्टिनेन्ट जनरल उपेन्द्र द्विवेदीलाई ३० जुनबाट आगामी सेना प्रमुख नियुक्त गरेको छ,” भारतीय रक्षा मन्त्रालयले जारी गरेको विज्ञप्तिमा भनिएको छ । 

नेपाल र भारतबीच एकअर्का देशका सेना प्रमुखलाई मानार्थ महारथीको सम्मान दिने अभ्यास रहीआएको छ ।