काठमाडौं । त्रिवि शिक्षण अस्पताल महाराजगंजका कार्यालय सहयोगी राजाराम भण्डारी नक्कली प्रमाणपत्रमा दोषी ठहर भएका छन् ।

विशेष अदालतका अध्यक्ष न्यायाधीश टेकनाराण कुँवर र सदस्यहरू रामबहादुर थापा र मुरारीबाबु श्रेष्ठको इजलासले भण्डारीलाई दोषी ठहर गरेको हो । 

२०४५ साल असार २४ मा कार्यालय सहयोगीमा भर्ना भएका भण्डारी ०४७ भदौ ३१ मा स्थायी भएका थिए । हाल कार्यालय सहयोगी पदमा कार्यरत भण्डारीविरुद्ध अख्तियार दुरुपयोग अनुसन्धान आयोगले यही जेठ २ गते मुद्दा दायर गरेको थियो ।

विशेष अदालतले मुद्दा दर्ता भएको २३ दिनमै फैसला गरेको हो । फैसलासँगै उनले जागिरबाट पाउने सबै सेवा, सुविधा गुमाएका छन् ।

भण्डारीको प्रमाणपत्र नक्कली भएको ठहरसहितको विवरण विशेष अदालतमा पठाएपछि उनी दोषी ठहर भएका हुन् । भण्डारीलाई तीन हजार रुपैयाँ जरिबाना हुने विशेष अदालतको फैसलामा उल्लेख छ ।