![सेनाले सगरमाथाबाट हटायो ११ टन फोहोर, चार शव र एउटा कंकाल](https://12khari.top/uploads/posts/efsdg-1717730388.jpg)
काठमाडौं । नेपाली सेनाले यो वर्ष सगरमाथा र अरू दुई हिमालबाट ११ टन फोहोर, चार शव र एउटा कंकाल हटाएको जनाएको छ । सेनाले त्यहाँ रहेको फोहोर हटाउन ५५ दिनसम्म एउटा ‘ट्रुप्स’ खटाएको थियो । यसरी फोहोर सफा गरिएका हिमालमा सगरमाथा, नुप्त्से र ल्होत्से रहेका जनाइएको छ ।
अनुमानानुसार ५० टनभन्दा धेरै फोहोर र २०० बढी शव सगरमाथामा रहेको मानिन्छ । बीबीसीले नेपाली सेनालाई उद्धृत गर्दै जनाएअनुसार विश्वकै सबैभन्दा अग्लो ‘गार्वेज डम्प’का रूपमा व्याख्या भइरहेको स्थानबाट फोहोर उठाउने कार्य सन् २०१९ देखि वार्षिक रूपमा गरिँदै आएको छ ।
पाँचपटकको सफाइका क्रममा ११९ टन फोहोर र १४ शव तथा केही कंकाल समेत हटाइएको सेनालाई उद्धृत गर्दै बीबीसीले जनाएको छ ।
भविष्यमा नेपाल सरकारले माउन्टेन रेन्जर टिम बनाएर फोहोरको अनुगमन गर्ने र यो जम्मा गर्न थप रकम छुट्ट्याइने समेत पर्यटन विभागका पर्वतारोहणसम्बन्धी निर्देशक राकेश गुरुङले बताएका छन् ।
यसपालि सरकारले सगरमाथा आरोहणका निम्ति ४२१ जनालाई अनुमति दिएको थियो । अघिल्लो वर्ष ४७८ जनालाई अनुमति दिइएको थियो । उक्त संख्यामा नेपाली गाइड समावेश गरिएको छैन । त्यसैले यो वर्ष करिब ६०० जनाले सगरमाथा आरोहण गरेको अनुमान छ ।
यसपालि आठ पर्वतारोहीको मृत्यु भएको वा हराइरहेको पाइएको छ । गत वर्ष उक्त संख्या १९ थियो ।