![एप्पललाई पछि पार्दै एनभिडिया बन्यो विश्वको दोस्रो ठूलो कम्पनी](https://12khari.top/uploads/posts/Nvidia-1-1717649591.png)
काठमाडौं । अमेरिकी बहुराष्ट्रिय सफ्टवेयर कम्पनी एनभिडिया विश्वको दोस्रो ठूलो मूल्यवान कम्पनी बनेको छ । बुधबार सेयर मूल्य बढेपछि एनभिडियाले एप्पलको कुल बजार मूल्यलाई उछिनेको हो ।
बुधबार एप्पलको कुल पूँजीकरण ३ ट्रिलियन अमेरिकी डलर हुँदा एनभिडियाको मूल्य ३.०१ ट्रिलिनय अमेरिकी डलर पुगेको हो ।
आर्टिफिसियल इन्टेलिजेन्स (एआई)को विकास बढ्दै जाँदा एनभिडियाको फ्ल्यागसिप एच१०० चिपले बलियो बजार लिएको छ ।
सन् २०२३ को मेमा एनभिडियाको पुँजीकरण एक ट्रिलियन अमेरिकी डलर पुगेको थियो । गत फेब्रुअरीमा अल्फाबेट र अमेजनलाई पछि पार्दै यसको बजार मूल्य २ ट्रिलियन पुगेको थियो ।
अहिले एनभिडियाले एप्पललाई समेत पछि पारेको हो । यो अब ३.१५ ट्रिलियन अमेरिकी डलर बजार मूल्य रहेको माइक्रोसफ्टभन्दा मात्रै पछि छ ।
एआई चिपको बजारमा एनभिडियाको हिस्सा ७० देखि ९५ प्रतिशतको बीचमा छ । एआईको विकास बढ्दै जाँदा यसले माइक्रोसफ्टलाई समेत पछि पार्न सक्ने ठानिएको छ ।