काठमाडौं । नेपालका निम्ति आइसल्यान्डको अवैतनिक महावाणिज्यदूतमा विदुषी राणालाई नियुक्त गरिएको छ । उनको नियुक्तिसँगै काठमाडौंमा नयाँ महावाणिज्य दूतावासको उद्घाटन गरिएको छ ।

उक्त अवसरमा होटेल याक एन्ड यतीमा आयोजित विशेष कार्यक्रममा उद्योग, वाणिज्य तथा आपूर्तिमन्त्री दामोदर भण्डारीले महावाणिज्यदूत राणाले नेपालको प्रसिद्ध क्षेत्रको प्रचारप्रसार र अरू स्थानको विकासमा पनि महत्त्वपूर्ण भूमिका खेल्ने विश्वास व्यक्त गरे ।

नवनियुक्त महावाणिज्यदूत राणाले दुई देशको सम्बन्ध प्रगाढ बनाउन र नेपालमा औद्योगिक र प्राविधिक क्षेत्रको विकासमा आइसल्यान्डको सहयोगका निम्ति महत्त्वपूर्ण भूमिका खेल्ने बताइन् । नयाँ अवैतनिक वाणिज्यदूतको हैसियतमा नेपाल र आइसल्यान्डबीचको सम्बन्धलाई अझ सुमधुर बनाउन भूमिका खेल्ने उनले प्रतिबद्धता व्यक्त गरिन् ।

कार्यक्रममा अवैतनिक वाणिज्यदूतहरू, सरकारी अधिकारीलगायत ३०० भन्दा बढी व्यक्ति उपस्थित भएका थिए ।