काठमाडौं । नेपाली राष्ट्रिय क्रिकेट टिमका कप्तान रोहितकुमार पौडेल आईसीसी ट्वान्टी–२० विश्वकप–२०२४ को सबैभन्दा कान्छा कप्तान बनेका छन् । २१ वर्ष २७५ दिन (सोमबारसम्ममा)का रोहित विश्वकपकै सबैभन्दा कान्छा कप्तान बनेका हुन् ।

रोहितपछि अफगानिस्तानका राशिद खान विश्वकपमा कप्तानी गर्ने दोस्रो कान्छा खेलाडी हुन् । राशिद २५ वर्षका हुन् । यस्तै, यो सूचीको तेस्रो स्थानमा बंगलादेशका कप्तान नज्मुल हुसैन सान्टो छन् । उनी पनि २५ वर्षको उमेरमा बंगलादेशबाट विश्वकपमा नेतृत्व सम्हाल्दै छन् ।

क्यानडाका साद बिन जफर विश्वकपको यस संस्करणमा कप्तानी सम्हाल्ने सबैभन्दा पाका क्रिकेटर हुन् । जफरले ३७ वर्ष १७४ दिनको उमेरमा क्यानडाको नेतृत्व गरिरहेका छन् । यस्तै, भारतका कप्तान रोहित शर्मा (३७ वर्ष ३४ दिन) र स्कटल्यान्डका रिची बेरिङ्टन (३७ वर्ष ३३ दिन) विश्वकपमा कप्तानी सम्हालिरहेका दोस्रो र तेस्रो पाका कप्तान हुन् ।

अमेरिका र वेस्ट इन्डिजमा जुन २ देखि प्रतियोगिता सुरु भएको छ । १० वर्षपछि विश्वकपको मञ्चमा उक्लिएको नेपाली टिमले मंगलबार नेदरल्यान्ड्सविरुद्ध खेल्दै विश्वकप यात्राको सुरुआत गर्नेछ । नेपालले यसअघि सन् २०१४ मा बंगलादेशमा भएको ट्वान्टी–२० विश्वकप खेलेको थियो ।

विश्वकपको यो संस्करणमा नेपाल समूह ‘डी’ मा छ । यो समूहमा नेपालसँगै नेदरल्यान्ड्स, बंगलादेश, दक्षिण अफ्रिका र श्रीलंका छन् । श्रीलंका सन् २०१४ को ट्वान्टी–२० विश्वकप विजेता समेत हो ।

विश्वकपको यस संस्करणमा कुल २० टिमको सहभागिता छ । प्रत्येक समूहमा पाँच टिम रहने गरी चार समूहमा विभाजन गरिएको छ । क्रिकेट विश्वकपको कुनै पनि संस्करणमा यति धेरै टिमको सहभागिता भएको यो पहिलोपटक हो ।

आईसीसी–२० विश्वकप–२०२४ मा कप्तानी सम्हालिरहेका कप्तानहरूको उमेर :

नेपाल : रोहितकुमार पौडेल (२१ वर्ष २७५ दिन)
बंगलादेश : नज्मुल हुसैन सान्टो (२५ वर्ष २६३ दिन)
अफगानिस्तान : राशिद खान– (२५ वर्ष २२४ दिन)
नेदरल्यान्ड्स : स्कट एर्डवार्ड्स (२७ वर्ष २८५ दिन)
श्रीलंका : वनिन्दु हसरंगा (२८ वर्ष २८५ दिन)
नामिबिया : गेर्हार्ड इरास्मस– (२९ वर्ष २९ दिन)
दक्षिण अफ्रिका : आइदेन मार्करम (२९ वर्ष २०९ दिन)
पाकिस्तान : बाबर आजम (२९ वर्ष २२२ दिन)
वेस्ट इन्डिज : रोभमन पावेल (३० वर्ष २८५ दिन) 
अमेरिका : मोनांक पटेल (३० वर्ष ३३३ दिन)
ओमान : अकिब इल्यास (३१ वर्ष २३९ दिन)
अस्ट्रेलिया : मिचेल मार्स (३२ वर्ष १९४ दिन)
युगान्डा : ब्रियन मासाबा (३२ वर्ष २२७ दिन)
इंग्ल्यान्ड : जस बटलरः (३३ वर्ष २३५ दिन) 
आयरल्यान्ड : पाउल स्टर्लिङ (३३ वर्ष २४७ दिन)
न्युजिल्यान्ड : केन विलियम्सन (३३ वर्ष २६५ दिन)
पपुवा न्यु गिनी (पीएनजी) : असद भाला (३६ वर्ष २७७ दिन)
स्कटल्यान्ड : रिची बेरिङ्टन (३७ वर्ष ३३ दिन) 
भारत : रोहित शर्मा (३७ वर्ष ३४ दिन)
क्यानडा : साद बिन जफर (३७ वर्ष १७४ दिन)