काठमाडौं । प्रमुख प्रतिपक्ष दल नेपाली कांग्रेसका सांसद सपना राजभण्डारीले बजेटले देशमा रोजगारीको सिर्जना गर्ने र युवाहरूलाई देशभित्रै बस्ने वातावरण बनाउन नसकेको बताएकी छन् ।

सोमबारको प्रतिनिधिसभा बैठकमा आर्थिक वर्ष २०८१/०८२ को राजस्व र व्ययको वार्षिक अनुमान (बजेट)माथिको सामान्य छलफलमा बोल्दै उनले युवाहरू आर्थिक विकासका स्तम्भ, उद्योगहरूको नवप्रवर्धक र समुदायका अगुवा भए पनि उनीहरूलाई बजेटले वेवास्ता गरेको बताइन् ।

“बजेट बनाउँदा घोषणा गरिएका कार्यक्रमहरू र तिनको कार्यान्वयनमा ध्यान दिन आवश्यक छ । हरेक दिन करिब तीन हजार नेपाली रोजगार र भविष्य खोज्दै देश छोड्न बाध्य छन् । यसले राज्यको आत्मा र स्वाभिमानलाई पनि असर गरेको छ,” उनले भनिन्, “सरकारले यस विषयमा बजेटमा वेवास्ता गरेको छ । बजेटमा रोजगारीको अवसर सिर्जना गर्न क्षमता र व्यक्तिको विकासका लागि स्रोतको व्यवस्था छैन । यो लापरबाही सामान्य हैन युवामाथिको सपनामा गरिएको कुठाराघात पनि हो ।” 

उनले बजेटले वर्तमान अर्थ क्षेत्रमा देखिएको शिथिलतालाई सम्बोधन गर्न नसकेको बताइन् । साथै, उनले बजेटले शिक्षा व्यावसायिक तालिमलाई पनि वेवास्ता गरेको उल्लेख गरिन् । “राम्रो शब्दजालमा कोरिएको कमजोर बजेट भन्न सकिन्छ,” उनले भनिन् । 

सांसद राजभण्डारीले बजेटमा राष्ट्रका किसान र रेमिट्यान्स पठाएर अर्थतन्त्र चलाउने नेपालीहरूलाई पूरै वेवास्ता गरिएको पनि बताइन् ।