काठमाडौं । औषधि व्यवस्था विभागले एक नेपाली कम्पनीको सिरप बिक्रीमा रोक लगाएको छ । रुपन्देहीको एसियन फार्मास्युटिकल्सबाट उत्पादित ‘ओन्डा सिरप’ नामक ओन्डानसेट्रोन झोल औषधिको ब्याच नम्बर ओडीएल ००५१ मा समस्या देखिएको हो ।

राष्ट्रिय औषधि प्रयोगशालामा परीक्षाणका क्रममा न्यून गुणस्तरीय पाइएकाले उक्त ब्याचका औषधि बिक्री–वितरण नगर्न र बजारबाट फिर्ता ल्याउन विभागले निर्देशन दिएको छ । उक्त बनावट भएकोे औषधि सिफारिस र प्रयोग समेत नगर्न विभागले आग्रह गरेको छ ।

उत्पादक कम्पनीलाई हाल बजारमा रहेको औषधि फिर्ता गरी त्यसको विवरण विभागमा बुझाउन भनिएको छ । उक्त औषधि बालबालिकामा बान्ता रोक्न प्रयोग गर्ने गरिन्थ्यो ।