काठमाडौं । सन्दीप लामिछानेले ट्वान्टी–२० विश्वकप क्रिकेट खेल्न भिसा नपाएको विषयमा संसद् बैठकमा प्रश्न गरिएको छ । राष्ट्रिय प्रजातन्त्र पार्टी (राप्रपा)का प्रमुख सचेतक ज्ञानबहादुर (ज्ञानेन्द्र) शाहीले उक्त विषय उठाएका हुन् ।

आइतबारको प्रतिनिधिसभा बैठकमा परराष्ट्र नीति वाचन गर्दै उनले सन्दीपले भिसा नपाउनु सिंगो देशमाथिको अपमान भएको टिप्पणी गरे । सांसद शाहीले संसार चिनाउने खेलाडी वा कलाकारका कारण भएको भन्दै सन्दीपको भिसा नलाग्नु अमेरिकाले सिंगो देशमाथि गरेको अपमान भएको तर्क गरे ।

उनले नेपालको पराष्ट्र नीतिमा समेत प्रश्न उठाउँदै भने, “केका आधारमा परराष्ट्र नीति बनाएको हो ? पार्टीको कार्यकर्ताको मेनिफेस्टो कि पञ्चशीलताको आधारमा ?”

सांसद शाहीले नेपालको बेइज्जत हुँदा पनि काम गर्न नसक्ने भन्दै खेलकुद, पराष्ट्रमन्त्री र मन्त्रालयको नैतिकतामा प्रश्न उठाए । “अदालतले न्याय दिन्छ, क्यानले नाम पठाउँछ, आईसीसीले स्वीकृत गर्छ, खेलाडीको भिसा लाग्दैन । अनि, प्रधानमन्त्री र मन्त्री देशको झन्डा हल्लाएर हिँड्न लाज लाग्दैन ?,” उनले भने, “मन्त्रीले स्टन्टबाज मात्र गर्ने हो ?”