काठमाडौं । राष्ट्रिय दलित आयोगले प्रदर्शनरत नेपाली चलचित्र ‘पुजार सार्की’ हेर्न आह्वान गरेको छ । निर्माता सुवास भुसाललाई पत्र लेख्दै यो चलचित्र हेर्न आह्वान गरेको आयोगले जनाएको छ । आयोगका अध्यक्ष देवराज विश्वकर्माद्वारा हस्ताक्षरित पत्रमा चलचित्र सबै नेपाली भाषी र संसारभरका मानवता–प्रेमीहरूले हेरेर शिक्षा लिन सकिनेखालको रहेको उल्लेख छ । 

चलचित्रले समाज परिवर्तनको सन्देश प्रवाह गरेकाले चलचित्र हेर्न, यसको मर्म र भाव ग्रहण गर्न तथा प्रदर्शनलाई सार्थक बनाउन आयोगको आग्रह छ । 

“अन्तर्राष्ट्रिय मानवअधिकारको विश्वव्यापी घोषणापत्र, नेपालको संविधान र अन्य कानुनद्वारा समेत वर्जित मानिएको जातीय छुवाछुत, भेदभाव तथा बहिष्करणबाट सिर्जित परिस्थितिको अन्त्य गर्नु सबै सभ्य मानिसहरूको कर्तव्य हो,” आयोगले भनेको छ, “मानवमानवबीच अन्तर घुलनका लागि स्वैच्छिक जोडीहरूको विवाहलाई प्रोत्साहन र संरक्षण गर्न जरुरी छ ।” 

चलचित्र ‘पुजार सार्की’मा देखाइए जस्तै आज पनि नेपाली समाजमा स्वैच्छिक विवाहलाई वर्जित गर्ने कुसंस्कार रहेको आयोगले जनाएको छ । शिक्षित र सभ्य मानिसलाई चलचित्रले गम्भीर प्रश्न गरेको आयोगले जनाएको छ । 

दिनेश राउतले निर्देशन गरेको चलचित्र विकाश सुवेदीले लेखेका हुन् । 

गत बिहीबार रिलिज भएको ‘पुजार सार्की’ दोस्रो हप्तामा चलिरहेको छ । चलचित्रमा आर्यन सिग्देल, प्रदीप खड्का, पल शाह, अञ्जना बराइली, परीक्षा लिम्बूलगायत कलाकार प्रमुख भूमिकामा छन् ।