काठमाडौं । नेपाली कांग्रेसका महामन्त्री विश्वप्रकाश शर्माले संविधानले वाद प्रतिवादको अधिकार दिएको बताएका छन् । 

सोमबार बिहान एमाले उपाध्यक्ष विष्णु पौडेलले कांग्रेसले केपी ओलीमाथि मिथ्याको आरोप लगाएको भन्दै प्रतिकारको चेतावनी दिएका थिए । उनले सार्वजनिक रूपमा लिखित माफी माग्नुपर्ने बताएका थिए । नभए कांग्रेससँगको राजनीतिक सम्बन्ध सिध्याएर लडाईं लड्ने चेतावनी उनको थियो । 

बूढानीकलण्ठमा पार्टी बैठकबाट बाहिरिने क्रममा महामन्त्री शर्माले सञ्चारकर्मीसँग कुरा गर्दै संविधानले दिएको अधिकार प्रयोग गरेको बताए । 

उनले ‘विष्णु पौडेलले भनेको उता बुटवलतिरको पार्टीको केन्द्रीय उपसभापति.. उहाँ एक जिममेवार राजनीतिज्ञ हुनुहुन्छ र उहाँले त्यसो भन्नुभयो भन्ने लाग्दैन’ भन्दै घुमाउरो जवाफ दिए । गिरीबन्धु जग्गा प्रकरणमा अदालतको पूर्णपाठ आउँदा कांग्रेसले प्रतिक्रिया नदिएको तर उग्ररूप धारणा गर्दै ओलीले प्रतिक्रिया दिएको भनाइ उनको थियो । 

“उहाँले कांग्रेस पार्टीले ५१ बिघा बेचेर खायो भन्नुभयो । सँगै बसेर संविधान बनाएको हो नि । उहाँले आरोप लगाउन छुट दिने प्रतिवाद गर्न कांग्रेसले उहाँलाई सोध्नुपर्दैन,” उनले भने । 

गिरीबन्धु प्रकरणमा ५२, ६० र ७८ सालको सरकारमा कांग्रेस नभएको भन्दै महामन्त्री शर्माले थपे, “कांग्रेसको तर्फबाट महामन्त्री विश्वप्रकाशले बोल्यो होला सहकारी बन्धु गठबन्धन भनेर । उहाँले बोल्दा कांग्रेसले गिरीबन्धुको जग्गा बेचेर कमिसन खायो भन्नुभयो  । त्यो भनेपछि हामीले तथ्य राख्नुपर्‍यो नि ।”
 
ओलीले रुद्ररुप धारणा गर्ने हो भने आफूहरूले मौनरूप धारण गर्नुपर्ने आवश्यक्ता नभएको भनाइ उनको थियो । “लिखित क्षमायाचना भन्नुभयो रे । मैले हेर्न पाएको छैन । तर, भनेको हो भने संविधान सँगै बसेर लेखेको हो । उहाँले गलत आरोप लगाउन छुट छ भने सही प्रतिवाद गर्ने छुट कांग्रेसलाई छ । यो उत्तर कोरिया हैन, यो नेपाल हो, दिस इज नेपाल ।”