काठमाडौं । प्रमुख प्रतिपक्ष नेपाली कांग्रेसले आफ्नो अध्यक्षविरुद्ध निरन्तर टार्गेट गरेर प्रतिशोध साँधेको भन्दै सत्तारूढ दल नेकपा (एमाले) आक्रोशित भएको छ । बालुवाटारमा भएको शीर्ष नेताको बैठकबाट बाहिरिने क्रममा एमाले उपाध्यक्ष विष्णु पौडेलले कांग्रेसले पछिल्ला दिनमा एमाले र अध्यक्ष केपी शर्मा ओलीलाई टार्गेट गरेर आरोप लगाएको बताए ।

उनले नेकपा एमाले र पार्टी अध्यक्ष ओलीविरुद्ध कांग्रेसले प्रायोजित पूर्वाग्राही तथ्यहीन गलत भ्रामक र आधारहीन लान्छाना लगाएको भन्दै आक्रोश पोखे । “यसप्रकारको आधारहीन आरोपबाट पछि हट्न अनुरोध गर्न चहान्छु । यसबाट पछि हटेन भने यसविरुद्ध राजनीतिक प्रतिवादमा हामी उत्रन्छौँ,” उनले भने । 

कांग्रेस सहमतिमा पुग्नुभन्दा पनि परिस्थिति बिथोल्न लागि परेको आरोप उनको थियो । साथै उनले आफ्ना अध्यक्ष ओलीमाथि लगाएको आरोपमा लिखित र सार्वजनिक रूपमा माफी माग्न कांग्रेसलाई अनुरोध गरे । कांग्रेसले यसो नगरे सबै राजनीतिकसँग सम्बन्ध तोडिन सक्ने चेतावनी उनको थियो । 

“लिखित रूपमा क्षमायाचना गर्नुपर्छ, सार्वजनिक माफी माग्नुपर्छ । अन्यथा कांग्रेससँग ठिक ढंगबाट सम्बन्ध अघि बढ्दैन । बुझोस् यस प्रकारको अराजनीतिक आरोपलाई सुनेर एमाले बस्दैन,” उनले भने । 

नेपाली कांग्रेसले नेकपा एमाले अध्यक्ष ओलीको इसारामा अहिलेको सबै खेल भइरहेको भन्ने सार्वजनिक टिप्पणी गर्दै आएको छ । कांग्रेसबाट बोल्ने अधिंकास नेताहरूले ओलीकै डिजाइनमा यो सबै भइरहेको आरोप लगाउने गरेका छन् । साथै, संसद् पनि ओलीको डिजाइनमा सभामुखले पेलेर चलाइरहेको कांग्रेसको आरोप छ ।