काठमाडौं । राष्ट्रिय प्रजातन्त्र पार्टीका प्रमुख सचेतक ज्ञानबहादुर शाही(ज्ञानेन्द्र)ले गृहमन्त्री रवि लामिछानेलाई छानबिन समिति बनाउन डराएको हो भनि प्रश्न गरेका छन् । आइतबारको प्रतिनिधिसभा बैठकमा उनले गृहमन्त्री लामिछानेले प्रतिपक्षमा हुँदा उठाएको प्रश्न फिर्ता गरेको बताए ।  “मुटु छ कि छैन ? डराएको हो ? खुट्टा कमाएको हो ?,” उनले प्रश्न गरे। 

उनले सदनमा सत्तापक्ष र प्रतिपक्षमा रहँदा फरक कुरा गर्न नहुने बताए । शाहीले संसद् संसद्जस्तो नभएको बताए ।  “संसद् संसद्जस्तो भएको छैन । दायाँ बस्दा एउटा हुँदो रहेछ । बाँयातिर बस्दा अर्को हुनेरहेछ,” उनले भने । उनले गृहमन्त्रीलाई छानबिन समिति बनाउन दिन आग्रह गरे ।

प्रमुख सचेतक शाहीले आफूहरूलाई जनताले पुराना दलले गरेनन् भनेर मत दिएको बताए । अहिले नयाँ शक्तिले नाक देखाउने ठाउँ नरहेको उनको भनाइ छ ।  

“नयाँ शक्तिले पनि नाक देखाउन ठाउँ रहेन । के फरक भयो ? इतिहास हेरौं त । के थियो हाम्रो पार्टी संगठन ? कुन ठाउँमा थियौँ ? जनताले यी पुराना दलले गर्न सकेनन् । विकल्पको रूपमा जानपर्छ भनेका हुन् । तर, अहिले संसद् बाधक बनेको छ,” उनले भने ।