काठमाडौं । अमेरिकी अभिनेत्री स्कारलेट जोहानसनले आर्टिफिसियल इन्टेलिजेन्स (एआई) कम्पनी ओपनएआईलाई आफ्नोजस्तो आवाज प्रयोग नगर्न आग्रह गरेकी छन् ।

गएको सेप्टेम्बरमा जोहानसनलाई उनको आवाज च्याटजीपीटी फोर.ओ सिस्टममा प्रयोग गर्न ओपनएआईले प्रस्ताव गरेको उनले बताएकी छन् । आफूले उक्त प्रस्ताव अस्वीकार गरेपछि कम्पनीले आफ्नोजस्तै आवाज प्रयोग गरेको उनले एक वक्तव्य जारी गर्दै जनाएकी हुन् ।

ओपनएआईले च्याटजीपीटीका निम्ति गएको साता जीपीटी–फोर.ओ सिस्टम सार्वजनिक गरेको थियो । यसमा आवाजसहितको प्रतिक्रिया दिन सक्नेलगायत फिचर समेटिएको थियो । सोहीअनुसार ओपनएआईले सार्वजनिक गरेका मध्ये स्काइ भ्वाइस जोहानसनको आवाजसँग मेल खाएको हो ।

अहिले कम्पनीले स्काइ भ्वाइस रोकेको छ । तर, कम्पनीले जोहानसनको आवाजमा सीमित नभएर अरू वास्तविक ‘ट्यालेन्ट’हरूको आवाज प्रयोग गरेको जनाएको छ ।

सन् २०१३ को ‘हर’ नामक चलचित्रका मुख्य पात्र उनको भर्चुअल असिस्टेन्टको आवाजसँग प्रेममा परेको कथा छ । उक्त आवाज जोहानसनको हो । त्यसैबाट प्रभावित भएर ओपनएआईका सीईओ साम अल्टम्यानले जोहानसनको आवाज च्याटजीपीटीमा प्रयोग गर्न प्रस्ताव राखेका थिए ।